உலக கால்பந்து அரங்கில் அர்ஜென்டினாவின் நட்சத்திர வீரர் லியோனல் மெஸ்ஸி, உலகக்கோப்பை வரலாற்றில் ஒரு புதிய மைல்கல்லை எட்டியுள்ளார். தொடர்ந்து 7 உலகக்கோப்பை போட்டிகளில் கோல் அடித்து, ஜாம்பவான்களின் சாதனையை அவர் முறியடித்துள்ளார்.
டல்லாஸில் நடைபெற்ற ஜோர்டான் அணிக்கு எதிரான குரூப் ஜே லீக் போட்டியில், 60-வது நிமிடத்தில் மாற்று வீரராக களமிறங்கிய மெஸ்ஸி, 80-வது நிமிடத்தில் ஒரு அற்புதமான ஃபிரீ-கிக் மூலம் கோல் அடித்தார். இதன் மூலம், பிரான்ஸின் ஜஸ்ட் ஃபோன்டைன் மற்றும் பிரேசிலின் ஜெய்ர்சின்ஹோ ஆகியோரின் தொடர்ந்து 6 போட்டிகளில் கோல் அடித்த சாதனையை 39 வயதான மெஸ்ஸி தகர்த்துள்ளார்.
மெஸ்ஸியின் இந்த கோல் வேட்டை 2022 கத்தார் உலகக்கோப்பையில் ஆஸ்திரேலியாவுக்கு எதிரான ரவுண்ட் ஆஃப் 16 சுற்றில் தொடங்கியது. அதைத் தொடர்ந்து நெதர்லாந்து, குரோஷியா மற்றும் இறுதிப் போட்டியான பிரான்ஸ் அணிக்கு எதிராகவும் அவர் கோல் அடித்தார். நடப்பு 2026 உலகக்கோப்பையில் அல்ஜீரியாவுக்கு எதிராக ஹாட்ரிக் கோலும், ஆஸ்திரியாவுக்கு எதிராக 2 கோல்களும் அடித்துள்ளார். ஜோர்டானுக்கு எதிரான கோலுடன் சேர்த்து, உலகக்கோப்பையில் அவரது மொத்த கோல்களின் எண்ணிக்கை 19 ஆக உயர்ந்துள்ளது.
முன்னதாக, ஆஸ்திரியாவுக்கு எதிரான போட்டியில் 2 கோல்கள் அடித்ததன் மூலம், உலகக்கோப்பை வரலாற்றில் அதிக கோல்கள் அடித்த ஜெர்மனியின் மிரோஸ்லாவ் குளோசேயின் சாதனையை மெஸ்ஸி முறியடித்திருந்தார். தற்போது தொடர்ந்து 7 போட்டிகளில் கோல் அடித்து மற்றொரு புதிய உலக சாதனையை படைத்துள்ளார்.
