கர்நாடக துணை முதல்வர் டி.கே.சிவக்குமார், மேகேதாட்டுவில் அணை கட்டுவதற்கான திருத்தப்பட்ட திட்ட அறிக்கை விரைவில் மத்திய அரசிடம் சமர்ப்பிக்கப்படும் என்றும், மத்திய அரசின் அனுமதி கிடைத்தவுடன் பூமி பூஜை நடத்தப்படும் என்றும், இதை தமிழக அரசு எதிர்க்க எந்த உரிமையும் இல்லை என்றும் சமீபத்தில் தெரிவித்திருந்தார். இதற்கு பதிலளிக்கும் விதமாக, ஜனநாயகத்திலும் கூட்டாட்சியிலும் இத்தகைய அணுகுமுறை விரும்பத்தக்கதல்ல என்றும், தமிழ்நாட்டின் காவிரி உரிமைகள் உச்ச நீதிமன்றத்தாலும் சட்டத்தாலும் உறுதி செய்யப்பட்டவை என்றும், இவற்றை டி.கே.சிவகுமார் போன்றவர்கள் மறந்துவிடக்கூடாது என்றும் கட்டுரை வலியுறுத்துகிறது.
கர்நாடகாவில் காவிரி ஆறு உற்பத்தி ஆனாலும், அதன் முழுமையான உரிமையை அம்மாநிலம் மட்டும் கோர முடியாது என்றும், அப்படி ஒவ்வொரு மாநிலமும் பேச ஆரம்பித்தால் இந்தியாவில் மாநிலங்களிடையேயான ஒற்றுமை என்னவாகும் என்றும் கேள்வி எழுப்பப்பட்டுள்ளது. மேகேதாட்டு திட்டத்திற்கு உச்ச நீதிமன்றம் இதுவரை அனுமதி வழங்கவில்லை என்றும், தமிழகத்தின் மனுவை நிராகரித்தபோது, திட்டம் ஆரம்ப கட்டத்தில் இருப்பதால் எதிர்ப்பது உகந்ததல்ல என்று மட்டுமே தெரிவித்ததாகவும், இது திட்டத்திற்கு முழுமையான அனுமதி கிடைத்துவிட்டது என்று அர்த்தமல்ல என்றும் கட்டுரை சுட்டிக்காட்டுகிறது. மேலும், இத்திட்டம் இன்னும் தொழில்நுட்ப, சுற்றுச்சூழல், வனத்துறை மற்றும் சட்டப்பூர்வ அனுமதிகளுக்காக காத்திருப்பதாகவும், காவிரி நீர் மேலாண்மை ஆணையமும் திட்டத்தின் பல அம்சங்கள் ஆய்வில் இருப்பதாகக் குறிப்பிட்டுள்ளதாகவும் தெரிவிக்கப்பட்டுள்ளது.
மேகேதாட்டு திட்டம் தொடர்பாக தமிழகத்தின் முக்கிய கவலை நீரின் அளவு மட்டுமல்ல, நீர் திறக்கப்படும் காலமும் ஆகும். காவிரி டெல்டா விவசாயம் ஒரு கால அட்டவணையைச் சார்ந்துள்ளது என்றும், குறுவை, சம்பா, தாளடி போன்ற சாகுபடிகள் குறிப்பிட்ட மாதங்களில் நீர் கிடைக்கும்போது மட்டுமே வெற்றிகரமாக நடைபெற முடியும் என்றும் கட்டுரை விளக்குகிறது. நீர் வெளியீட்டில் சில வாரங்கள் தாமதம் ஏற்பட்டால்கூட ஆயிரக்கணக்கான ஏக்கர் நிலங்கள் பாதிக்கப்படலாம் என்றும், கடந்த காலங்களில் காவிரி நீர் தாமதமாக திறக்கப்பட்டபோது டெல்டா விவசாயிகள் சந்தித்த பொருளாதார இழப்புகள், பயிர் சேதங்கள், கடன் சுமைகள், வாழ்வாதார நெருக்கடிகள் மற்றும் சமூக பாதிப்புகள் பற்றியும் கட்டுரை விரிவாகப் பேசுகிறது.
இந்த வரலாற்றுப் பின்னணியில்தான் தமிழ்நாடு கூடுதல் நீர்த்தேக்கத் திட்டங்களை எச்சரிக்கையுடன் அணுகுவதாகவும், ஒரு பெரிய நீர்த்தேக்கம் நீரை சேமிப்பதற்கான வசதியாக மட்டுமல்லாமல், நீரின் ஓட்டத்தை கட்டுப்படுத்தும் அதிகாரமாகவும் மாறுகிறது என்றும் கட்டுரை கூறுகிறது. மேலும், மேகேதாட்டு திட்டம் அமையவுள்ள பகுதி சுற்றுச்சூழல் முக்கியத்துவம் வாய்ந்ததாகவும், அதன் நீண்டகால சுற்றுச்சூழல் விளைவுகளும் முழுமையாக ஆய்வு செய்யப்பட வேண்டும் என்றும் வலியுறுத்தப்பட்டுள்ளது. இந்த விவகாரத்தில் மத்திய அரசு நடுநிலைமையுடன் செயல்பட்டு, எந்த மாநிலத்தின் அரசியல் அழுத்தத்திற்கும் இடமளிக்காமல், தொழில்நுட்ப உண்மைகள் மற்றும் சட்டப்பூர்வ உரிமைகளின் அடிப்படையில் மட்டுமே முடிவெடுக்க வேண்டும் என்றும், தமிழ்நாட்டின் நியாயமான அச்சங்கள் பரிசீலிக்கப்பட வேண்டும் என்றும், காவிரி தீர்ப்பாயம் மற்றும் உச்ச நீதிமன்றம் வழங்கிய உரிமைகள் பாதிக்கப்படக்கூடாது என்றும் கட்டுரை வலியுறுத்துகிறது. ‘நதி எங்கள் மாநிலத்தில் உருவாகிறது; எனவே எங்களுக்கே முழு உரிமை’ என்ற கொள்கை இந்தியாவின் நீர்வள நிர்வாகத்தை குழப்பத்திற்கு உள்ளாக்கும் என்றும், இது இந்திய கூட்டாட்சியின் எதிர்காலத்தையும் கேள்விக்குள்ளாக்கும் என்றும் எஸ்.வி.ரமணி எழுதியுள்ள இந்தக் கட்டுரை கூறுகிறது.
