சென்னை, மதுரவாயல்-துறைமுகம் இடையே அமைக்கப்பட்டு வரும் ஈரடுக்கு மேம்பாலப் பணிகளில், செப்டம்பர் முதல் ஜனவரி மாதம் வரை கூவம் ஆற்றின் பகுதிகளில் பணிகள் நடைபெறாது என தேசிய நெடுஞ்சாலைத்துறை ஆணைய அதிகாரிகள் தெரிவித்துள்ளனர்.
சென்னை துறைமுகம் மற்றும் மதுரவாயல் இடையே சுமார் ரூ.5,600 கோடி ரூபாய் மதிப்பில் இந்த ஈரடுக்கு மேம்பாலப் பணிகள் நடைபெற்று வருகின்றன. தற்போது வரை சுமார் 22 சதவீதப் பணிகள் நிறைவடைந்துள்ளன. இந்த மேம்பாலம், கூவம் ஆற்றின் மேல்புறமாக சுமார் 15.5 கிலோமீட்டர் தொலைவுக்கு அமைகிறது.
மழைக்காலமான செப்டம்பர் மாதம் முதல் ஜனவரி மாதம் வரை, கூவம் ஆற்றின் பகுதிகளில் மேம்பாலப் பணிகளை மேற்கொள்ள முடியாது என்பதால், அந்த மாதங்களில் ஆற்றுப்பகுதிகளில் பணிகள் நடைபெறாது என்று அதிகாரிகள் குறிப்பிட்டுள்ளனர். இந்த முக்கியத்துவம் வாய்ந்த திட்டம், வருகிற 2029 ஆம் ஆண்டு மார்ச் மாதம் நிறைவடையும் என எதிர்பார்க்கப்படுகிறது.
மேலும், கிளாம்பாக்கம் முதல் செங்கல்பட்டு அருகே உள்ள மகேந்திரா சிட்டி வரையிலான மேல்நிலை சாலை அமைக்கும் திட்டத்திற்கும் விரிவான திட்ட அறிக்கை தயாரிக்கப்பட்டு வருகிறது. இந்த திட்டத்திற்கான மதிப்பிடப்பட்ட செலவு ரூ.3,186 கோடி ஆகும். இத்துடன், சென்னை மெட்ரோ ரயில் விரிவாக்கத் திட்டத்தையும் இந்த சாலைத் திட்டத்துடன் இணைப்பது குறித்தும் ஆய்வுகள் மேற்கொள்ளப்பட்டு வருகின்றன.
நடப்பு நிதியாண்டில், செங்கல்பட்டு-திண்டிவனம் நெடுஞ்சாலையை 6 வழிச்சாலையாக மேம்படுத்தவும் திட்டமிடப்பட்டுள்ளது. இதற்காக ரூ.3,098 கோடி ரூபாய் நிதி ஒதுக்கீடு செய்யப்பட்டுள்ளது. இது பயண நேரத்தைக் குறைத்து, போக்குவரத்தை எளிதாக்கும் என எதிர்பார்க்கப்படுகிறது.
கூடுதலாக, திண்டிவனம்-புதுச்சேரி தேசிய நெடுஞ்சாலைப் பகுதியில், விபத்துகளைத் தடுக்கும் வகையில் 7 இடங்களில் சாலைப் பாதுகாப்பு மேம்பாட்டுப் பணிகள் விரைவில் தொடங்கப்பட உள்ளன. இதற்காக ரூ.147 கோடி ரூபாய் மதிப்பில் பணிகள் மேற்கொள்ளப்படும்.
தேசிய நெடுஞ்சாலைகளில் பொதுவாக 60 கிலோமீட்டருக்கு ஒரு சுங்கச்சாவடி அமைக்கப்படுவது வழக்கம். இருப்பினும், சாலையைப் பயன்படுத்துவோரின் வசதிக்காகவும், சுமையைக் குறைக்கும் நோக்கிலும், இந்த குறிப்பிட்ட தொலைவுக்குள் கூடுதல் சுங்கச்சாவடிகள் அமைப்பது குறித்தும் தேசிய நெடுஞ்சாலைத்துறை ஆணைய அதிகாரிகள் ஆலோசித்து வருவதாகத் தெரிவித்துள்ளனர்.
