மதுரை மாவட்டம் சோலை அழகுபுரம் சப்பாணிகோவில் தெருவைச் சேர்ந்த 50 வயதான சரவணன், 'சப்பாணி சரவணன்' என்ற பெயரில் அறியப்பட்டவர். இவர் மீது பல்வேறு குற்ற வழக்குகள் நிலுவையில் உள்ளதோடு, சில வழக்குகளில் சிறைத்தண்டனையும் அனுபவித்துள்ளார்.
தனது வழக்கமான பழக்கத்தின்படி, இன்று அதிகாலை ஜெய்ஹிந்த்புரம் காவல் நிலையம் அருகே உள்ள ஒரு டீக்கடைக்கு சரவணன் வந்துள்ளார். அப்போது, அங்கு மறைந்திருந்த 5 பேர் கொண்ட ஆயுதமேந்திய மர்ம கும்பல் சரவணனை குறிவைத்து திடீரென தாக்கியுள்ளது.
தாக்குதலில் இருந்து தப்பிக்க சரவணன் நடுரோட்டில் அலறியபடி ஓடியுள்ளார். ஆனால், விடாமல் துரத்திய அந்தக் கும்பல், காவல் நிலையத்திற்கு மிக அருகிலேயே சரவணனை ஓட ஓட விரட்டி, கத்தி, அரிவாள் போன்ற பயங்கர ஆயுதங்களால் சரமாரியாக வெட்டியுள்ளது.
இந்த கொடூர தாக்குதலில் பலத்த காயமடைந்த சரவணன், சம்பவ இடத்திலேயே ரத்த வெள்ளத்தில் துடிதுடித்து பரிதாபமாக உயிரிழந்தார். இந்த சம்பவம் அப்பகுதியில் பெரும் அதிர்ச்சியையும் பரபரப்பையும் ஏற்படுத்தியுள்ளது.
சம்பவ இடத்திற்கு விரைந்த ஜெய்ஹிந்த்புரம் போலீசார், சரவணனின் உடலைக் கைப்பற்றி, பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும், இதுகுறித்து வழக்குப்பதிவு செய்து விசாரணை மேற்கொண்டு வருகின்றனர்.
முன்விரோதம் காரணமாக இந்தக் கொலை நடந்திருக்கலாம் என்று போலீசார் சந்தேகிக்கின்றனர். கொலையாளிகளை பிடிக்க தனிப்படை அமைக்கப்பட்டு தீவிர தேடுதல் வேட்டை நடைபெற்று வருகிறது. இந்த சம்பவம் அப்பகுதி மக்களிடையே பெரும் அச்சத்தை ஏற்படுத்தியுள்ளது.
