சர்வதேச கால்பந்து போட்டிகளில் இருந்து ஓய்வு பெறுவதாக நட்சத்திர வீரர் லியோனல் மெஸ்ஸி அறிவித்துள்ளார். உலகின் மிகச்சிறந்த கால்பந்து வீரராகக் கருதப்படும் மெஸ்ஸியின் கடைசி சர்வதேசப் போட்டி, உலககோப்பை பைனலாகும். இதில் ஸ்பெயினிடம் அர்ஜென்டினா அணி 1-0 என்ற கணக்கில் தோல்வியடைந்தது.
இறுதிப் போட்டி முடிந்து இரண்டு நாட்களுக்குப் பிறகே தான் ஓய்வு பெற முடிவு செய்ததாகவும், தனது தந்தை ஜார்ஜின் மறைவு இந்த முடிவில் தன்னை மேலும் உறுதியாக்கியுள்ளதாகவும் மெஸ்ஸி தனது உணர்ச்சிப்பூர்வமான அறிக்கையில் தெரிவித்துள்ளார். கிளப் கால்பந்தின் ஜாம்பவானான மெஸ்ஸி, ஆகஸ்ட் 17, 2005 அன்று ஹங்கேரிக்கு எதிரான நட்புரீதியான போட்டியில் தனது 18வது வயதில் அறிமுகமானார். அறிமுகமானதில் இருந்தே அர்ஜென்டினா தேசிய அணியின் முகமாகவும், நம்பிக்கையாகவும் திகழ்ந்தார்.
கத்தாரில் நடைபெற்ற 2022 ஃபிஃபா உலகக் கோப்பையில் அர்ஜென்டினா அணியை கேப்டனாக வழிநடத்தி சாம்பியன் பட்டம் வென்றார். அங்கு அவர் தனது இரண்டாவது கோல்டன் பால் விருதையும் வென்றார். அவர் 2021 மற்றும் 2024 ஆம் ஆண்டுகளில் அடுத்தடுத்து கோபா அமெரிக்கா சாம்பியன்ஷிப்களையும், இத்தாலிக்கு எதிரான 2022 ஃபைனலிசிமா கோப்பையையும் வென்று கொடுத்துள்ளார்.
மேலும், 2008 பெய்ஜிங் ஒலிம்பிக் போட்டியில் தங்கப் பதக்கத்தையும், 2005 ஃபிஃபா யு-20 உலகக் கோப்பையையும் வென்றுள்ளார். ஒட்டுமொத்தமாக 207 சர்வதேச போட்டிகளில் விளையாடியுள்ள அவர், 125 கோல்களை அடித்துள்ளதுடன், 65 அசிஸ்டுகளையும் செய்துள்ளார். அவர் தொடர்ந்து இண்டர் மியாமி கிளப் அணிக்காக விளையாடுவார்.
'இறுதிப் போட்டி முடிந்து இவ்வளவு காலம் கடந்த பின், இதைப்பற்றி நான் அதிகம் யோசித்து, தேசிய அணியில் இருந்து நான் ஓய்வு பெறுகிறேன் என்பதை அனைவருக்கும் தெரிவிக்க விரும்புகிறேன். இது உள்ளுக்குள் மிகவும் வலியை ஏற்படுத்திய ஒரு முடிவுதான், ஆனால் இதுவே சரியான தருணம் என்பதை நான் உணர்கிறேன். நாங்கள் அனைத்தையும் வென்ற இந்த கடந்த சில ஆண்டுகளில் மட்டுமல்ல, அதற்கு முன்பும் நான் எப்போதும் எனது முழு பங்களிப்பையே வழங்கியிருக்கிறேன் என்று சத்தியம் செய்கிறேன். இந்த ஜெர்சிக்காகவும், உங்களுக்கு மகிழ்ச்சியைத் தருவதற்காகவும், கால்பந்து மூலம் நீங்கள் அர்ஜென்டினாவாக இருப்பதில் பெருமைகொள்ளச் செய்யவும் நான் எப்போதும் போராடினேன், என்னால் முடிந்த அனைத்தையும் கொடுத்தேன்' என்று மெஸ்ஸி தனது அறிக்கையில் குறிப்பிட்டுள்ளார்.
'இனி அதிக காலம் இல்லை, பல்வேறு அத்தியாயங்கள் முடிவுக்கு வருகின்றன. இது எனக்கு மிகவும் வலியைத் தரும் அத்தியாயம். தேசிய அணியின் ஒரு பகுதியாக இருப்பதை நான் நேசிக்கிறேன், நேசித்தேன், எப்போதும் நேசிப்பேன். என்னிடம் இருந்த அனைத்தையும் நான் கொடுத்துவிட்டேன், அதற்கு மேல் தருவதற்கு என்னிடம் எதுவும் இல்லை. மேலும், தேசிய அணியில் விளையாடத் தகுதியான சிறந்த இளம் வீரர்கள் பலர் தற்போது வந்து கொண்டிருக்கிறார்கள். இந்த 20 ஆண்டுகளில் நீங்கள் காட்டிய அனைத்து அன்புக்கும் நன்றி. மைதானத்திற்குள் இருந்து நீங்கள் எழுப்பும் குரல்களைக் கேட்பதை நான் தவறவிடுவேன். இப்போது நான் உங்களில் ஒருவனாக மாறி, எப்போதும் வெளியில் இருந்து ஆதரவளிப்பேன்; நல்ல தருணங்களிலும், குறிப்பாக கடினமான தருணங்களிலும் எனது ஆதரவு தொடரும்' என்றும் அவர் கூறியுள்ளார்.
'என்னை அர்ஜென்டினாவாகப் பிறக்க வைத்ததற்காக இறைவனுக்கு நன்றி. வாமோஸ் அர்ஜென்டினா! ஜூலை 21 அன்று, இறுதிப் போட்டி முடிந்த இரண்டு நாட்களுக்குப் பிறகு இந்த வரிகளை நான் எழுதினேன். இன்று, எனது தந்தைக்கு நேர்ந்த சம்பவத்திற்குப் பிறகு, இந்த முடிவில் நான் முன்பை விட இன்னும் உறுதியாக இருக்கிறேன்' என்று மெஸ்ஸி தனது கடிதத்தில் தெரிவித்துள்ளார். மேலும், தனது குடும்பத்தினருக்கும், பயிற்சியாளர்கள், சக வீரர்கள் மற்றும் நிர்வாக உறுப்பினர்களுக்கும் தனது நன்றியைத் தெரிவித்துள்ளார்.
