இந்திய மின்சார ஸ்கூட்டர் சந்தையில் Kinetic நிறுவனம் தனது தடத்தைப் பதிக்க தீவிரமாக உள்ளது. நாளுக்கு நாள் அதிகரித்து வரும் மின்சார ஸ்கூட்டர்களின் தேவையை பூர்த்தி செய்யும் வகையில், Kinetic நிறுவனம் தனது புதிய Green Zing இ-ஸ்கூட்டரை அறிமுகப்படுத்தியுள்ளது. இந்த இ-ஸ்கூட்டர் பற்றிய விரிவான தகவல்களைக் காண்போம்.
Kinetic Green Zing இ-ஸ்கூட்டரில் இரண்டு வேரியண்ட்கள் உள்ளன. Zing Standard வேரியண்ட் ரூபாய் 71,657 விலையிலும், Zing Big B வேரியண்ட் ரூபாய் 79,818 விலையிலும் கிடைக்கிறது. முதல் வேரியண்டில் 1.4 கிலோவாட் பேட்டரி பொருத்தப்பட்டுள்ளது. இது ஒருமுறை சார்ஜ் செய்தால் 70 கிலோமீட்டர் வரை மைலேஜ் தரும். இதன் அதிகபட்ச வேகம் மணிக்கு 25 கிலோமீட்டர் ஆகும். இந்த ஸ்கூட்டர் நீலம், சிவப்பு மற்றும் வெள்ளை நிறங்களில் கிடைக்கிறது.
இரண்டாவது வேரியண்டான Zing Big B, 1.68 கிலோவாட் பேட்டரியுடன் வருகிறது. ஒருமுறை சார்ஜ் செய்தால் 100 கிலோமீட்டர் வரை மைலேஜ் அளிக்கும் திறன் கொண்டது. இதன் அதிகபட்ச வேகமும் மணிக்கு 25 கிலோமீட்டர் தான். இந்த வேரியண்ட்டும் வெள்ளை, நீலம் மற்றும் சிவப்பு வண்ணங்களில் கிடைக்கிறது. இந்த இ-ஸ்கூட்டரின் எடை 81 கிலோ ஆகும். ஒருமுறை முழுமையாக சார்ஜ் செய்ய 4 மணி நேரம் ஆகிறது.
லித்தியம் அயர்ன் பேட்டரி, 60 Nm டார்க் இழுவைத்திறன், BLDC மோட்டார், போர்ட்டபிள் பேட்டரி, IP67 பேட்டரி பாதுகாப்பு, CBS பிரேக்கிங் சிஸ்டம், முன்பக்கம் மற்றும் பின்பக்கம் டிஸ்க் பிரேக், அலாய் வீல்கள், ட்யூப்லெஸ் டயர்கள், டெலிஸ்கோபிக் ஃபோர்க் சஸ்பென்ஷன் மற்றும் பின்புறம் டூயல் ஷாக் அப்சார்பர் சஸ்பென்ஷன் போன்ற அம்சங்கள் இதில் இடம்பெற்றுள்ளன. பேட்டரிக்கு 3 ஆண்டுகள் அல்லது 60,000 கிலோமீட்டர் வரையிலும், மோட்டாருக்கு 20,000 கிலோமீட்டர் அல்லது 2 வருடங்கள் வரையிலும் வாரண்டி வழங்கப்படுகிறது.
