பிரபல இயக்குநர் பிரசாந்த் நீல் இயக்கத்தில், நடிகர் ஜூனியர் என்டிஆர் கதாநாயகனாக நடிக்கும் ‘டிராகன்’ திரைப்படம் பெரும் எதிர்பார்ப்பை ஏற்படுத்தியுள்ளது. ‘கே.ஜி.எஃப்’, ‘சலார்’ படங்களின் பிரம்மாண்ட வெற்றியைத் தொடர்ந்து, இந்தப் படத்தின் மீது ரசிகர்களுக்கு அதிக ஆர்வம் உள்ளது. ஜூனியர் என்டிஆருடன் நடிகை ருக்மணி வசந்த் ஜோடி சேர்கிறார். மைத்திரி மூவி மேக்கர்ஸ் தயாரிக்கும் இந்தப் படம், வரும் ஜூன் 11ஆம் தேதி தெலுங்கு, தமிழ், இந்தி உள்ளிட்ட 5 மொழிகளில் பிரம்மாண்டமாக வெளியாகவுள்ளது. சமீபத்தில் வெளியான இதன் முதல் கிளிம்ப்ஸ் வீடியோ ரசிகர்களிடையே பெரும் வரவேற்பைப் பெற்றுள்ளது.
இது குறித்து இயக்குநர் பிரசாந்த் நீல் கூறுகையில், 'டீசரில் நாங்கள் காட்டியது படத்தின் பின்னணி மட்டுமே. அதில் உள்ள விஷயங்கள், படத்தின் உண்மையான கதைக்கு முற்றிலும் எதிரானவை. இதுவரை யாரும் பார்த்திராத ஒரு சிறந்த தேசபக்தி படத்தை உருவாக்க நாங்கள் முயற்சி செய்கிறோம், அதில் நிச்சயம் வெற்றி பெறுவோம்' என்று நம்பிக்கை தெரிவித்தார்.
மேலும் அவர், 'இந்த கதாபாத்திரத்திற்காக ஜூனியர் என்டிஆரிடம் சற்று எடையைக் குறைக்கச் சொன்னேன். ஆனால், அவர் அதை மிகவும் தீவிரமாக எடுத்துக்கொண்டு, 4 மாதங்கள் தீவிர உடற்பயிற்சி மூலம் எடையைக் குறைத்தார். ஒரு கட்டத்தில் அவர் மிகவும் மெலிந்து, வெளுத்து காணப்பட்டார். எடையைக் குறைப்பதை நிறுத்துமாறு நான் சொன்ன பிறகும் அவர் கேட்கவில்லை. இதைப் பார்த்து அவருடைய குடும்பத்தினர் மற்றும் நண்பர்கள் அனைவரும் என் மீதுதான் கோபப்பட்டார்கள்' என்று நெகிழ்ச்சியுடன் கூறினார்.
‘டிராகன்’ படத்தின் டீசர் வெளியானதிலிருந்து, ஜூனியர் என்டிஆரின் தோற்றம் மற்றும் படத்தின் மீதான எதிர்பார்ப்பு ரசிகர்கள் மத்தியில் அதிகரித்துள்ளது. பிரசாந்த் நீலின் இயக்கத்தில், ஜூனியர் என்டிஆரின் அசாதாரண நடிப்பு இந்தப் படத்தை வேற லெவலுக்கு கொண்டு செல்லும் என எதிர்பார்க்கப்படுகிறது. தேசபக்தி கதையம்சத்துடன் உருவாகும் இந்தப் படம், ரசிகர்களுக்கு ஒரு புதிய அனுபவத்தை வழங்கும் என்று எதிர்பார்க்கப்படுகிறது.
