இந்திய அணியின் தொடக்க ஆட்டக்காரர் யாஷஸ்வி ஜெய்ஸ்வால், தனது கடைசி மூன்று ஒருநாள் போட்டிகளில் இரண்டாவது சதத்தை அடித்து அசத்தியுள்ளார். இதனால், மூத்த வீரர் ரோஹித் சர்மாவின் எதிர்காலம் குறித்து தேர்வுக்குழுவினர் முக்கிய முடிவை எடுக்க வேண்டிய கட்டாயத்தில் உள்ளனர். ஆப்கானிஸ்தானுக்கு எதிரான மூன்றாவது ஒருநாள் போட்டியில், 39 வயதான ரோஹித் சர்மா தொடக்கத்தில் சற்று தடுமாறினாலும், பின்னர் சிறப்பாக விளையாடி 79 ரன்களைக் குவித்தார். மேலும், ஜெய்ஸ்வாலுடன் இணைந்து முதல் விக்கெட்டுக்கு 170 ரன்கள் சேர்த்தார்.
ரோஹித் சர்மா, ஆப்கானிஸ்தான் சுழற்பந்து வீச்சாளர் ரஷித் கானின் பந்துவீச்சை நாலாபுறமும் சிதறடித்தார். இந்த மூன்று போட்டிகள் கொண்ட தொடரில் அவரது ரன்கள் முறையே 16, 48 மற்றும் 79 ஆகும். இருப்பினும், வரவிருக்கும் இங்கிலாந்து சுற்றுப்பயணத்தில் தனது இடத்தை உறுதி செய்ய இந்த இன்னிங்ஸ்கள் போதுமானதா என்ற கேள்வி எழுகிறது. ஒருவேளை அவர் தேர்வு செய்யப்பட்டால், தொடர்ந்து சிறப்பான ஃபார்மில் இருக்கும் 24 வயது இளம் வீரரான ஜெய்ஸ்வாலின் நிலை என்னவாகும்? போன்ற கேள்விகளுக்கு கேப்டன் சுப்மன் கில் பதிலளித்தார்.
இது குறித்து பேசிய கில், 'அனைத்து வீரர்களும் சிறப்பாகச் செயல்படும்போது, இது போன்ற ஒரு ஆரோக்கியமான தேர்வுக் குழப்பம் ஏற்படுவது நல்லதுதான். நாளை அல்லது அடுத்த இரண்டு நாட்களில் இங்கிலாந்து சுற்றுப்பயணத்திற்கான இந்திய அணி அறிவிக்கப்படும். அதன் பிறகு, அணி வீரர்களின் பட்டியலைப் பார்த்துவிட்டு, இங்கிலாந்து மண்ணில் களமிறங்குவதற்கான சிறந்த லெவன் அணியைத் தேர்வு செய்வோம்' என்று தெரிவித்தார். மேலும், 'அனைவரின் உடற்தகுதியும் எப்படி இருக்கிறது என்பதை நாம் பார்க்க வேண்டும். அனைவரும் உடற்தகுதியுடன் இருந்தால், அதன் அடிப்படையில் சிறந்த பிளேயிங் லெவன் அணியை உருவாக்குவோம்' என்றும் கூறினார்.
ஜெய்ஸ்வாலை வெகுவாகப் பாராட்டிய கேப்டன் கில், அவருக்கு ஒருநாள் போட்டிகளில் தொடர்ந்து வாய்ப்புகள் கிடைக்காமல் போவது துரதிர்ஷ்டவசமானது என்று குறிப்பிட்டார். 'அவர் ஒரு அசாத்தியமான திறமை கொண்ட வீரர் என்பது நம் அனைவருக்கும் தெரியும். அனைத்து வீரர்களும் அணியில் இருக்கும்போது, ஒரு சில தருணங்களில் அவர் துரதிர்ஷ்டவசமாக அணியில் இடம் பெறாமல் போகிறார்' என்று கில் கூறினார். இந்தத் தொடரில் விராட் கோலி விளையாடாததால், ஜெய்ஸ்வாலுக்கு சில போட்டிகளில் விளையாடும் வாய்ப்பு கிடைத்தது. இன்றைய போட்டியிலும் அவர் மிக அற்புதமாக விளையாடினார். அவர் இதே ஃபார்மைத் தொடர்ந்து, தனக்குக் கிடைக்கும் வாய்ப்புகளைச் சரியாகப் பயன்படுத்துவார் என்று நம்புகிறேன்' என்றும் அவர் கூறினார். இங்கிலாந்தில் நிலவும் சூழல், தென்னாப்பிரிக்காவில் நாம் எதிர்கொள்ளும் சூழலுக்கு சற்றே நெருக்கமாக இருக்கும் என்றும், அங்கு அனைத்து வீரர்களும் முழு உடற்தகுதியுடன் களமிறங்கினால், அது ஒரு சிறந்த தொடராக அமையும் என்றும் கில் தெரிவித்தார்.
