பின்லாந்தில் நடைபெற்ற நிகழ்ச்சியில் இந்திய வெளியுறவுத்துறை அமைச்சர் ஜெய்சங்கர், ஐரோப்பிய நாடுகள் இந்தியாவுக்கு எதிராக ஆயுதங்களைப் பயன்படுத்துவதாகக் குற்றம் சாட்டினார். அரசுமுறை பயணமாக பின்லாந்து சென்றிருந்த அமைச்சர், அந்நாட்டு வெளியுறவுத்துறை அமைச்சர் மற்றும் ஐக்கிய அரபு அமீரகத்தின் வெளியுறவுத்துறை இணை அமைச்சருடன் சர்வதேச அரசியல் சூழல் குறித்து கலந்துரையாடினார்.
இந்தியா கச்சா எண்ணெய் கொள்முதல் செய்வது, கிடைக்கும் இருப்பு மற்றும் விலை நிலவரத்தை அடிப்படையாகக் கொண்டே நடைபெறுகிறது என்றும், அந்த சூழலில்தான் ரஷ்யாவில் இருந்து இந்தியா எண்ணெய் வாங்கியது என்றும் ஜெய்சங்கர் விளக்கினார். வழக்கமாக ரஷ்ய எண்ணெயை அதிகமாக வாங்கிய ஐரோப்பிய நாடுகள், பின்னர் மத்திய கிழக்கு நாடுகளிடம் இருந்து எண்ணெய் வாங்கத் தொடங்கியதால், இந்தியா ரஷ்யாவிடம் இருந்து எண்ணெய் கொள்முதல் செய்ததாக அவர் கூறினார். நிலைமைகளுக்கு ஏற்ப இந்தியா தனது முடிவுகளை எடுக்கிறது என்பதை அவர் வலியுறுத்தினார்.
அதேபோல், இந்திய தயாரிப்பு ஆயுதங்களால் எந்த ஐரோப்பிய நாடும் தாக்கப்படுவதில்லை என்றும், ஆனால் ஐரோப்பிய நாடுகள் விற்பனை செய்யும் ஆயுதங்கள் இந்தியாவுக்கு எதிராக பயன்படுத்தப்படுகின்றன என்றும் ஜெய்சங்கர் தெரிவித்தார். இது தற்போது மட்டும் நடைபெறும் விஷயம் அல்ல, பல ஆண்டுகளாக தொடர்கிறது என்றும் அவர் குறிப்பிட்டார். மேலும், ஐரோப்பாவின் பாதுகாப்புக்கு அச்சுறுத்தலாக இந்தியர்கள் எந்த நடவடிக்கையிலும் ஈடுபடுவதில்லை என்றும் அவர் கூறினார்.
சர்வதேச அரசியல் சூழல் குறித்த கலந்துரையாடலில், இந்தியா தனது நலன்களுக்கு ஏற்ப முடிவுகளை எடுக்கும் என்பதை ஜெய்சங்கர் திட்டவட்டமாக தெரிவித்தார். குறிப்பாக, எண்ணெய் கொள்முதல் மற்றும் பாதுகாப்பு விவகாரங்களில் இந்தியாவின் நிலைப்பாட்டை அவர் தெளிவாக விளக்கினார்.
