ஐபிஎல் 2026 தொடரில் லக்னோ சூப்பர் ஜெயன்ட்ஸுக்கு எதிரான போட்டியில் சென்னை சூப்பர் கிங்ஸ் அணி ஏழு விக்கெட் வித்தியாசத்தில் தோல்வியடைந்தது. இந்தப் போட்டியில் சிஎஸ்கேயின் இளம் வேகப்பந்து வீச்சாளர் அன்ஷுல் கம்போஜ், தனது பந்துவீச்சில் அதிகமான ரன்களை விட்டுக்கொடுத்தது ரசிகர்களுக்கு பெரும் ஏமாற்றத்தை அளித்தது. முதலில் பேட்டிங் செய்த சிஎஸ்கே அணி 187 ரன்கள் குவித்த போதிலும், லக்னோ அணி 16.4 ஓவர்களிலேயே இலக்கை எளிதாக எட்டி வெற்றி பெற்றது.
இந்த ஆட்டம் அன்ஷுல் கம்போஜுக்கு ஒரு மறக்க முடியாத மோசமான போட்டியாக அமைந்தது. குறிப்பாக, போட்டியின் இறுதி ஓவர்களில் நிகோலஸ் பூரன், அன்ஷுல் வீசிய பந்துகளில் தொடர்ச்சியாக நான்கு சிக்ஸர்களை பறக்கவிட்டது பெரும் பரபரப்பை ஏற்படுத்தியது. பேட்ஸ்மேன்களுக்கு சாதகமான டி20 கிரிக்கெட்டில், பந்துவீச்சாளர்கள் ரன்களை கட்டுப்படுத்துவது சவாலானது. சில சமயங்களில் பேட்ஸ்மேன்களின் அதிரடிக்கு ஈடுகொடுக்க முடியாமல் பந்துவீச்சாளர்கள் அதிக ரன்களை விட்டுக் கொடுத்து சொதப்புவதுண்டு. அந்த வகையில், ஐபிஎல் வரலாற்றில் மிக மோசமான எக்கானமி ரேட்களைப் பதிவு செய்த முதல் ஐந்து பந்துவீச்சாளர்கள் யார் என்பதைப் பார்ப்போம்.
ஐபிஎல் 2024ல் டெல்லி கேப்பிடல்ஸ் அணிக்கு எதிராக விளையாடிய ராஜஸ்தான் ராயல்ஸ் வீரர் அவேஷ் கான், 2 ஓவர்களில் 42 ரன்களை விட்டுக்கொடுத்து 21.00 எக்கானமி ரேட் உடன் விக்கெட் ஏதும் எடுக்கவில்லை. ஐபிஎல் 2025ல் சென்னை சூப்பர் கிங்ஸ் பந்துவீச்சாளர் கலீல் அஹமது, 3 ஓவர்களில் 65 ரன்களை விட்டுக்கொடுத்து 21.66 எக்கானமி ரேட்டைப் பதிவு செய்தார். 2013ல் புனே வாரியர்ஸ் வீரர் அலி மூர்த்தசா, 2 ஓவர்களில் 45 ரன்களை விட்டுக்கொடுத்து 22.50 எக்கானமி ரேட்டை பெற்றார். 2024ல் சன்ரைசர்ஸ் ஹைதராபாத் வீரர் வாஷிங்டன் சுந்தர், 2 ஓவர்களில் 46 ரன்களை விட்டுக்கொடுத்து 23.00 எக்கானமி ரேட் உடன் ஒரு விக்கெட்டை எடுத்தார்.
தற்போது, ஐபிஎல் வரலாற்றில் மிக மோசமான எக்கானமி ரேட் என்ற விரும்பத்தகாத சாதனையை சென்னை சூப்பர் கிங்ஸ் வேகப்பந்து வீச்சாளர் அன்ஷுல் கம்போஜ் படைத்துள்ளார். லக்னோ சூப்பர் ஜெயன்ட்ஸுக்கு எதிராக, அவர் வீசிய 2.4 ஓவர்களில் 63 ரன்களை விட்டுக்கொடுத்து ஒரு விக்கெட் கூட எடுக்கவில்லை. அவரது எக்கானமி ரேட் 23.6 ஆக பதிவானது. இந்தப் போட்டியில் அவர் எட்டு சிக்ஸர்களை விளாசப்பட்டார். இது 2023ல் யாஷ் தயால் எட்டு சிக்ஸர்களை விட்டுக் கொடுத்ததற்கு சமமானதாகும். மூன்று அல்லது அதற்கும் குறைவான ஓவர்கள் வீசி 60 ரன்களுக்கு மேல் விட்டுக்கொடுத்த இரண்டாவது பந்துவீச்சாளர் என்ற மோசமான சாதனையையும் கம்போஜ் படைத்துள்ளார்.
