தரம்சாலா: டெல்லி கேப்பிடல்ஸ் பந்துவீச்சாளர்களை நாலாபுறமும் சிதறடித்து 210 ரன்கள் என்ற இமாலய இலக்கை நிர்ணயித்துள்ளது பஞ்சாப் கிங்ஸ் அணி. குறிப்பாக உலகின் முன்னணி பந்துவீச்சாளரான மிட்செல் ஸ்டார்க்கின் ஓவர்களை பஞ்சாப் கிங்ஸ் பேட்ஸ்மேன்கள் எவ்வித பயமும் இன்றி வெளுத்து வாங்கிய விதம் ரசிகர்களை ஈர்த்தது. இந்தப் போட்டியில் டாஸ் இழந்து முதலில் பேட்டிங் செய்த பஞ்சாப் அணிக்கு தொடக்க வீரர்களான பிரியான்ஷ் ஆர்யா மற்றும் பிரப்சிம்ரன் சிங் ஆகியோர் மிரட்டலான அடித்தளம் அமைத்தனர்.
பவர் பிளே ஓவர்களிலேயே இந்த ஜோடி 72 ரன்களைக் குவித்து டெல்லிக்கு ஆரம்பத்திலேயே அதிர்ச்சி கொடுத்தது. முதல் விக்கெட்டுக்கு 78 ரன்கள் சேர்த்த நிலையில் பிரப்சிம்ரன் 18 ரன்களில் ஆட்டமிழந்தார். ஆனால் மறுபுறம் சிக்ஸர் மழையாக பொழிந்த பிரியான்ஷ் ஆர்யா 33 பந்துகளில் 6 சிக்ஸர்கள் மற்றும் 2 பவுண்டரிகளுடன் 56 ரன்கள் குவித்து அசத்தினார்.
இதன் பின் ஜோடி சேர்ந்த கேப்டன் ஸ்ரேயாஸ் ஐயர் மற்றும் கூப்பர் கோனோலி ஆகியோர் அணியின் ஸ்கோரை ஜெட் வேகத்தில் உயர்த்தினர். 3வது விக்கெட்டுக்கு இந்த ஜோடி 83 ரன்கள் சேர்த்தது. சிறப்பாக ஆடிய கூப்பர் 27 பந்துகளில் 38 ரன்கள் எடுத்து ஆட்டமிழந்தார். மறுபுறம் கேப்டனுக்குரிய பொறுப்புடன் அதிரடியாக ஆடிய ஸ்ரேயாஸ் ஐயர் 36 பந்துகளில் 5 பவுண்டரி மற்றும் 3 சிக்ஸர்களுடன் 59 ரன்கள் குவித்து இறுதிவரை ஆட்டமிழக்காமல் களத்தில் நின்றார்.
கடைசி நேரத்தில் களமிறங்கிய சூர்யான்ஷ் ஷெட்ஜ் வெறும் 8 பந்துகளில் 2 சிக்ஸர்கள் உட்பட 21 ரன்கள் விளாச, பஞ்சாப் அணி 20 ஓவர்கள் முடிவில் 5 விக்கெட் இழப்பிற்கு 210 ரன்கள் என்ற பிரம்மாண்ட ஸ்கோரை எட்டியது. மறுபுறம் டெல்லி அணியின் பந்துவீச்சு படுமோசமாக இருந்தது.
நட்சத்திர வேகப்பந்து வீச்சாளர் மிட்செல் ஸ்டார்க் 4 ஓவர்களில் 57 ரன்களை வாரி வழங்கி 2 விக்கெட்டுகளை மட்டுமே வீழ்த்தினார். மாதவ் திவாரி 4 ஓவர்களில் 40 ரன்கள் கொடுத்து 2 விக்கெட்டுகளைக் கைப்பற்றினார். முகேஷ் குமார் ஓரளவுக்கு கட்டுக்கோப்பாக வீசி 31 ரன்களுக்கு 1 விக்கெட்டை எடுத்தார். லுங்கி நெகிடி விக்கெட் ஏதுமின்றி 46 ரன்களை வாரி வழங்கினார். இதுமட்டுமின்றி, 11 வைடுகள் உட்பட 17 ரன்களை டெல்லி பந்துவீச்சாளர்கள் எக்ஸ்ட்ராவாக தாரை வார்த்தது அந்த அணிக்கு பெரும் பின்னடைவாக அமைந்தது. டெல்லி அணிக்கு 211 ரன்கள் என்ற கடின இலக்கு நிர்ணயம் செய்யப்பட்டது.
