பிரபல ஆன்லைன் செஸ் விளையாட்டு தளமான Chess.com நடத்தும் வாராந்திர போட்டியில், உலகின் நம்பர் 1 வீரரும் நார்வே நாட்டைச் சேர்ந்தவருமான மேக்னஸ் கார்ல்சனை, 15 வயது இந்திய வீரர் வந்தன் எதிர்கொண்டார். இந்த பரபரப்பான ஆட்டத்தில், வந்தன் வெள்ளை நிறக் காய்களுடனும், கார்ல்சன் கறுப்பு நிற காய்களுடனும் விளையாடினர். ஆட்டத்தின் 31வது நகர்த்தலில் இருவரும் தங்களது ராணியை இழந்தனர். தொடர்ந்து 50வது நகர்த்தலின் போது, மேக்னஸ் கார்ல்சன் ஆட்டத்தில் இருந்து விலகியதால், இந்திய வீரர் வந்தன் வெற்றி பெற்றதாக அறிவிக்கப்பட்டது.
இது குறித்து வெற்றி பெற்ற வீரர் வந்தன் கூறுகையில், 'இந்த விளையாட்டில் நான் இழப்பதற்கு எதுவும் இல்லை, அதே சமயம் லாபம் அடைவதற்கும் எதுவும் இல்லை. எனது திறமையை வெளிப்படுத்தி விளையாட வேண்டும் என்ற எண்ணத்துடன் மட்டுமே களமிறங்கினேன்' என்று தெரிவித்தார். இது குறித்து வந்தனின் பெற்றோர் கூறுகையில், 'முதலில் இந்த போட்டியில் விளையாட அவர் தயக்கம் காட்டினார். நாங்கள் தான் அவருக்கு ஊக்கமளித்து விளையாட அனுப்பினோம். போட்டி முடிந்ததும், தந்தையிடம் ஓடிவந்து மேக்னஸ் கார்ல்சனுடன் விளையாடி வெற்றி பெற்றதாக மகிழ்ச்சியுடன் கூறினார்' என்று நெகிழ்ச்சியுடன் தெரிவித்தனர். இந்த வெற்றி, இளம் வீரர் வந்தனுக்கு பெரும் அங்கீகாரமாகவும், இந்திய செஸ் விளையாட்டுக்கு ஒரு பெருமை சேர்க்கும் நிகழ்வாகவும் அமைந்துள்ளது.
