பெல்ஃபாஸ்ட்: அயர்லாந்துக்கு எதிரான இரண்டாவது டி20 போட்டியில் இந்திய அணி 1 ரன் வித்தியாசத்தில் தோல்வியை தழுவியது. இருப்பினும், இந்திய அணியின் அறிமுக வீரர் பிரின்ஸ் யாதவ் தனது பந்துவீச்சு மற்றும் பேட்டிங்கால் அனைவரது கவனத்தையும் ஈர்த்துள்ளார். சர்வதேச டி20 கிரிக்கெட்டில் தனது முதல் பந்திலேயே சிக்ஸர் அடித்து இந்திய கிரிக்கெட்டில் புதிய சாதனைப் பட்டியலில் இடம்பிடித்துள்ளார்.
பெல்ஃபாஸ்டில் நடைபெற்ற இந்த ஆட்டத்தில் டாஸ் வென்ற இந்திய கேப்டன் ஸ்ரேயாஸ் ஐயர் முதலில் பந்துவீச்சைத் தேர்வு செய்தார். முதலில் பேட்டிங் செய்த அயர்லாந்து அணி, ஹாரி டெக்டரின் 53 ரன்கள் மற்றும் பெஞ்சமின் காலிட்ஸின் 37 ரன்கள் உதவியுடன் 20 ஓவர்களில் 8 விக்கெட்டுகளை இழந்து 154 ரன்கள் குவித்தது. இந்திய அணி தரப்பில், டெல்லியைச் சேர்ந்த வேகப்பந்து வீச்சாளர் பிரின்ஸ் யாதவ் தனது 4 ஓவர்களில் வெறும் 22 ரன்களை மட்டுமே விட்டுக்கொடுத்து 3 விக்கெட்டுகளை வீழ்த்தி அசத்தினார். ஐபிஎல் 2026 தொடரில் லக்னோ சூப்பர் ஜெயண்ட்ஸ் அணிக்காக சிறப்பாக செயல்பட்ட இவர், இந்திய அணியில் கிடைத்த வாய்ப்பை சரியாக பயன்படுத்திக் கொண்டார்.
பின்னர், 155 ரன்கள் என்ற இலக்குடன் களமிறங்கிய இந்திய அணி, ஆரம்பத்திலேயே சஞ்சு சாம்சன் மற்றும் அபிஷேக் சர்மா ஆகியோரின் விக்கெட்டுகளை முதல் ஓவரிலேயே இழந்தது. ராஜஸ்தானைச் சேர்ந்த வேகப்பந்து வீச்சாளர் ஜெய் முந்த்ரா இந்த விக்கெட்டுகளை கைப்பற்றினார். தொடர்ந்து, ஸ்ரேயாஸ் ஐயர், சிவம் துபே, அக்சர் படேல் மற்றும் அறிமுக வீரர் சூரியன்ஷ் ஷெட்கே ஆகியோர் சொற்ப ரன்களில் ஆட்டமிழந்து ரசிகர்களுக்கு ஏமாற்றத்தை அளித்தனர்.
இதன் விளைவாக, 20வது ஓவரில் 11வது வீரராக பிரின்ஸ் யாதவ் களமிறங்கினார். போட்டியின் கடைசி பந்தில் இந்திய அணி வெற்றிக்கு 7 ரன்கள் தேவைப்பட்ட நிலையில், ஹாரி டெக்டர் வீசிய பந்தை பிரின்ஸ் யாதவ் சிக்ஸருக்கு விரட்டினார். இதனால், இந்தியா 1 ரன் வித்தியாசத்தில் தோல்வியடைந்தது. இருப்பினும், சர்வதேச டி20 போட்டியில் தனது முதல் பந்திலேயே சிக்ஸர் அடித்த மூன்றாவது இந்திய வீரர் என்ற பெருமையை அவர் பெற்றார். இதற்கு முன்னர் சூர்யகுமார் யாதவ் மற்றும் ரமன்தீப் சிங் ஆகியோர் மட்டுமே இந்த சாதனையை நிகழ்த்தியுள்ளனர்.
