நாடு முழுவதும் உள்ள ஐடிபிஐ வங்கி ஊழியர்கள் மற்றும் அதிகாரிகள், மத்திய அரசின் தனியார்மயமாக்கல் நடவடிக்கைக்கு எதிர்ப்பு தெரிவித்து வரும் நவம்பர் 2 மற்றும் 3 ஆகிய தேதிகளில் நாடு தழுவிய வேலைநிறுத்தப் போராட்டத்தில் ஈடுபட உள்ளதாக அறிவித்துள்ளனர். இதனால், இந்த இரண்டு நாட்களும் ஐடிபிஐ வங்கியின் சேவைகள் முடங்கும் அபாயம் ஏற்பட்டுள்ளது.
ஐடிபிஐ வங்கியின் 60.72 சதவீதப் பங்குகளை கனடாவைச் சேர்ந்த 'ஃபேர்ஃபேக்ஸ் ஃபைனான்சியல் ஹோல்டிங்ஸ்' நிறுவனத்தின் துணை நிறுவனமான 'M/s 10955230 கனடா இங்க்' அமைப்புக்கு விற்பனை செய்ய மத்திய அரசு ஒப்புதல் அளித்துள்ளது. இதற்கு எதிர்ப்பு தெரிவித்து, அகில இந்திய ஐடிபிஐ அதிகாரிகள் சங்கம் மற்றும் அகில இந்திய தொழிற்துறை வளர்ச்சி வங்கி ஊழியர்கள் சங்கம் ஆகியவற்றை உள்ளடக்கிய 'ஐடிபிஐ அதிகாரிகள் மற்றும் ஊழியர்களின் ஐக்கிய பேரவை' இந்த போராட்டத்தை அறிவித்துள்ளது.
போராட்ட அறிவிப்பை வெளியிட்டுள்ள ஐக்கிய பேரவையின் அமைப்பாளர் தேவிதாஸ் துல்ஜாபூர்ஃகர், இணை அமைப்பாளர்கள் வித்தல் கோடேஸ்வர ராவ் மற்றும் ரத்னாகர் வான்கடே ஆகியோர், 2003 ஆம் ஆண்டு நாடாளுமன்றத்தில் அளிக்கப்பட்ட உறுதிமொழியை மதிக்கும் வகையில், மத்திய அரசு தனது பொதுத்துறை பங்குகளைத் தக்கவைத்துக் கொள்ள வேண்டும் எனக் கோரியுள்ளனர்.
மேலும், மத்திய அரசு அல்லது எல்.ஐ.சி நிறுவனம் பங்குச்சந்தையில் இருந்து மேலும் 6 சதவீத பங்குகளை வாங்கி, வங்கியின் குறைந்தபட்ச அரசுப் பங்குகளை 51 சதவீதமாகத் தக்கவைக்க வேண்டும் என்றும் அவர்கள் வலியுறுத்தியுள்ளனர். ஊழியர்களின் தற்போதைய சேவை நிபந்தனைகள், நலத்திட்டங்கள், ஓய்வூதியம் மற்றும் இடஒதுக்கீட்டுக் கொள்கைகள் பாதுகாக்கப்பட எழுத்துப்பூர்வமான சட்டப்பூர்வ உறுதிமொழி வழங்கப்பட வேண்டும் என்றும், ஒப்பந்த மற்றும் வெளிமுகமை ஊழியர்களைப் பணி நிரந்தரம் செய்ய வேண்டும் என்றும் கோரிக்கைகள் முன்வைக்கப்பட்டுள்ளன.
இந்த இரண்டு நாள் உண்ணாவிரதப் போராட்டம் நாடு முழுவதும் உள்ள அனைத்து ஐடிபிஐ வங்கி கிளைகள் மற்றும் அலுவலகங்களில் நடைபெறும் எனத் தெரிவிக்கப்பட்டுள்ளது. வங்கியின் நிர்வாகமும் மத்திய அரசும் ஊழியர்கள், வைப்புத்தொகையாளர்கள், சிறு கடன் வாங்குபவர்கள் மற்றும் நாட்டின் நலனைக் கருத்தில் கொண்டு பேச்சுவார்த்தை நடத்தி இந்தப் பிரச்சினையைத் தீர்க்க முன்வர வேண்டும் என தொழிற்சங்கங்கள் கோரிக்கை விடுத்துள்ளன.
தங்கள் கோரிக்கைகள் நிறைவேற்றப்படாவிட்டால், போராட்டத்தை மேலும் தீவிரப்படுத்தி, எவ்வித முன் அறிவிப்பும் இன்றி காலவரையற்ற வேலைநிறுத்தத்தில் ஈடுபட நேரிடும் என்றும் தொழிற்சங்கங்கள் எச்சரித்துள்ளன. இது வங்கி வாடிக்கையாளர்கள் மத்தியில் பெரும் அதிர்ச்சியை ஏற்படுத்தியுள்ளது.
முன்னதாக, பொருளாதார விவகாரங்களுக்கான அமைச்சரவைக் குழு (CCEA) அக்டோபர் 14 அன்று நடத்திய கூட்டத்தில், ஐடிபிஐ வங்கியின் 60.72 சதவீத பங்குகளை (மத்திய அரசின் 30.48% மற்றும் எல்.ஐ.சியின் 30.24%) ஃபேர்ஃபேக்ஸ் நிறுவனத்திற்கு ₹52,878 கோடிக்கு விற்பனை செய்ய ஒப்புதல் அளித்தது. இது இந்திய வங்கியியல் வரலாற்றில் மேற்கொள்ளப்படும் மிகப்பரிய அந்நிய நேரடி முதலீடு (FDI) என்பது குறிப்பிடத்தக்கது.
வங்கி மீண்டும் லாபப் பாதைக்குத் திரும்பியுள்ள நிலையில், பொதுத்துறை என்ற தனித்துவத்தைச் சிதைக்கும் இந்தத் தனியார்மயமாக்கல் நடவடிக்கைக்கு ஊழியர்கள் மற்றும் அரசியல் கட்சித் தலைவர்கள் கடும் எதிர்ப்பு தெரிவித்து வருகின்றனர். இந்த வேலைநிறுத்தம் வங்கிச் சேவைகளில் குறிப்பிடத்தக்க தாக்கத்தை ஏற்படுத்தும் என எதிர்பார்க்கப்படுகிறது.
