பிரெஞ்சு ஓபன் 2026 டென்னிஸ் தொடரின் ஆடவர் ஒற்றையர் பிரிவில், ஜெர்மனியின் நட்சத்திர வீரர் அலெக்சாண்டர் ஸ்வெரவ் தனது முதல் கிராண்ட்ஸ்லாம் பட்டத்தை வென்று சாதனை படைத்துள்ளார். பாரீஸில் நேற்று (ஜூன் 7) நடைபெற்ற விறுவிறுப்பான இறுதிப் போட்டியில், உலகத் தரவரிசையில் 3-வது இடத்தில் உள்ள 29 வயது ஸ்வெரவ், இத்தாலியின் இளம் வீரர் பிளேவியோ கோபோலியை எதிர்கொண்டார்.
சுமார் 4 மணி நேரம் 16 நிமிடங்கள் நீடித்த இந்த ஆட்டத்தில், ஸ்வெரவ் 6-1, 4-6, 6-4, 6-7(5), 6-1 என்ற செட் கணக்கில் போராடி வெற்றி பெற்றார். தனது முதல் கிராண்ட்ஸ்லாம் இறுதிப் போட்டியில் விளையாடிய 23 வயது கோபோலி, ஸ்வெரவ்வுக்கு கடுமையான சவாலை அளித்தார். முதல் செட்டை ஸ்வெரவ் எளிதாக வென்றாலும், அடுத்த செட்டில் கோபோலி மீண்டெழுந்து வென்றார். மூன்றாவது செட்டை ஸ்வெரவ் கைப்பற்றினாலும், நான்காவது செட்டில் கோபோலி டை-பிரேக்கரில் வென்று ஆட்டத்தை ஐந்தாவது செட்டிற்கு நகர்த்தினார்.
இறுதிச் செட்டில் கோபோலிக்கு உடல் ரீதியாக சோர்வு ஏற்பட்டதை தனக்குச் சாதகமாக்கிக் கொண்ட ஸ்வெரவ், தனது அனுபவ ஆட்டத்தை வெளிப்படுத்தி 5-வது செட்டை 6-1 என எளிதாகக் கைப்பற்றி சாம்பியன் பட்டத்தை வென்றார். வெற்றிப் புள்ளியைப் பெற்றவுடன் ஸ்வெரவ் மைதானத்தில் விழுந்து ஆனந்தக் கண்ணீர் வடித்தார்.
இதற்கு முன்பு ஸ்வெரவ் விளையாடிய 3 கிராண்ட்ஸ்லாம் இறுதிப் போட்டிகளிலும் அவருக்கு ஏமாற்றமே மிஞ்சியது. 2020 அமெரிக்க ஓபன், 2024 பிரெஞ்சு ஓபன், 2025 ஆஸ்திரேலிய ஓபன் இறுதிப் போட்டிகளில் அவர் தோல்வியடைந்திருந்தார். இந்தத் தோல்விகளால் அவர் மீது எழுந்த விமர்சனங்களுக்கு, தற்போது தனது முதல் கிராண்ட்ஸ்லாம் கோப்பையை வென்று அவர் முற்றுப்புள்ளி வைத்துள்ளார். இத்தொடரில் கார்லோஸ் அல்காரஸ், சின்னர் மற்றும் நோவக் ஜோகோவிச் ஆகியோர் முன்கூட்டியே வெளியேறியது ஸ்வெரவ்விற்கு சாதகமாக அமைந்தது.
