பெட்ரோல் விலை விண்ணை முட்டும் அளவுக்கு உயர்ந்துள்ள நிலையில், மக்கள் மெல்ல மெல்ல மின்சார வாகனங்களை நோக்கி நகரத் தொடங்கியுள்ளனர். அரசு வழங்கும் மானியங்களும், பெட்ரோல் வாகனங்களுடன் ஒப்பிடுகையில் மிகக் குறைவான பராமரிப்புச் செலவும் மக்களை மின்சார ஸ்கூட்டர்களை வாங்கத் தூண்டுகின்றன. தற்போது சந்தையில் 63-க்கும் மேற்பட்ட மின்சார இருசக்கர வாகன மாடல்கள் கிடைக்கின்றன.
மின்சார ஸ்கூட்டர்களின் மற்றொரு முக்கிய சிறப்பு, அவை சுற்றுச்சூழலுக்கு எந்தவித பாதிப்பையும் ஏற்படுத்துவதில்லை என்பதுதான். மேலும், ஒருமுறை சார்ஜ் செய்தால் 120 கி.மீ முதல் 400 கி.மீ வரை பயணிக்கக்கூடிய அதிநவீன தொழில்நுட்பத்துடன் இவை வருகின்றன. இதனால், நீண்ட தூரப் பயணங்களுக்கும் இவை ஏற்றவையாக இருக்கின்றன.
டிவிஎஸ் நிறுவனம் தனது ஐக்யூப் சீரிஸ் மூலம் மின்சார வாகன சந்தையில் வலுவான இடத்தைப் பிடித்துள்ளது. ஐக்யூப், ஐக்யூப் எஸ், ஐக்யூப் எஸ்டி மாடல்கள் வாடிக்கையாளர்களை வெகுவாகக் கவர்ந்துள்ளன. ஐக்யூப் எஸ்டி மாடல் 5.3 kWh பேட்டரியுடன் ஒருமுறை சார்ஜ் செய்தால் 212 கி.மீ தூரம் வரை செல்லும். இதன் விலை சுமார் 1,77,309 ரூபாய். குறைந்த விலையில் நல்ல ரேஞ்ச் தரும் டிவிஎஸ் ஆர்பிட் மாடல் 158 கி.மீ மைலேஜ் வழங்குகிறது.
பஜாஜ் தனது பாரம்பரியமான சேத்தக் பிராண்டை மின்சார ஸ்கூட்டராக மீண்டும் அறிமுகப்படுத்தியுள்ளது. இதன் ரேஞ்ச் 127 கி.மீ முதல் 153 கி.மீ வரை உள்ளது. விலை 1,11,785 ரூபாயிலிருந்து தொடங்குகிறது. இளைஞர்களின் விருப்பமான ஏத்தர் எனர்ஜி, ரிட்சா மற்றும் 450எக்ஸ் மாடல்கள் மூலம் சந்தையில் கலக்கி வருகிறது. ஏத்தர் 450எக்ஸ் மாடல் 6.4kW மோட்டாருடன் 161 கி.மீ ரேஞ்ச் தருகிறது. ஏத்தர் 450எஸ் மாடல் 1,31,574 ரூபாயிலிருந்து தொடங்குகிறது.
ஹீரோ மோட்டோகார்ப் நிறுவனத்தின் விடா பிராண்டும் கடும் போட்டியை அளிக்கிறது. விடா விஎக்ஸ்2 மாடல் 142 கி.மீ ரேஞ்சுடன் 1,06,872 ரூபாயிலிருந்து தொடங்குகிறது. விடா வி2 ப்ரோ மற்றும் பிளஸ் மாடல்கள் அதிகபட்சமாக 165 கி.மீ ரேஞ்ச் வழங்குகின்றன. ஓலா எலக்ட்ரிக் எஸ்இசட் மாடல் 64,343 ரூபாயில் 46 கி.மீ ரேஞ்ச் தருகிறது. ரிவர் இண்டி ஸ்கூட்டர் 163 கி.மீ ரேஞ்சுடன் 1,54,893 ரூபாயிலிருந்து தொடங்குகிறது. யமஹா இசி06 (169 கி.மீ) மற்றும் கொமாகி எஸ்இ அல்ட்ரா (418 கி.மீ) போன்ற மாடல்களும் சந்தையில் உள்ளன. மிகக் குறைந்த விலையில் 140 கி.மீ ரேஞ்ச் தரும் செலோ ஜப் மாடலின் விலை 49,110 ரூபாயிலிருந்து தொடங்குகிறது.
உங்கள் பெட்ரோல் செலவை கணிசமாகக் குறைக்கவும், சுற்றுச்சூழலைக் காக்கவும் விரும்பினால், இப்போது சந்தையில் உள்ள மின்சார ஸ்கூட்டர்கள் ஒரு சிறந்த தேர்வாக இருக்கும். டிவிஎஸ் ஐக்யூப், ஏத்தர் ரிட்சா போன்ற நவீன ஸ்கூட்டர்கள் உங்கள் பயண அனுபவத்தை நிச்சயம் மாற்றியமைக்கும்.
