2026 ஆம் ஆண்டு நடைபெற்ற தமிழ்நாடு, புதுச்சேரி மற்றும் கேரளா மாநில சட்டப்பேரவைத் தேர்தல்களுக்கான செலவு அறிக்கையை அனைத்திந்திய அண்ணா திராவிட முன்னேற்றக் கழகம் (அ.இ.அ.தி.மு.க) இந்திய தேர்தல் ஆணையத்திடம் சமர்ப்பித்துள்ளது. இந்த அறிக்கையின்படி, அ.தி.மு.க தனது தேர்தல் பிரச்சாரத்திற்காக மொத்தம் 109.61 கோடி ரூபாய்க்கு மேல் செலவிட்டுள்ளது.
குறிப்பாக, சமூக வலைதளங்கள், தொலைக்காட்சி மற்றும் இணையதள விளம்பரங்களுக்காக மட்டும் 103.98 கோடி ரூபாய் செலவிடப்பட்டுள்ளது. மேலும், தேர்தல் அறிக்கை புத்தகங்கள் அச்சிடுதல், நோட்டீஸ்கள், கொடிகள், பேனர்கள் போன்றவற்றுக்கு 4.11 கோடி ரூபாய் செலவாகியுள்ளது. அ.தி.மு.க பொதுச்செயலாளர் எடப்பாடி கே. பழனிசாமியின் பரப்புரை பயணச் செலவாக 1.75 லட்சம் ரூபாயும், அவரது வாகனத்திற்கான டீசல் செலவாக 4.14 லட்சம் ரூபாயும் கணக்கில் காட்டப்பட்டுள்ளது.
முன்னணி நட்சத்திரப் பேச்சாளர்களான முனைவர் எஸ்.எஸ். வைகைச்செல்வன், விந்தியா, கௌதமி, இயக்குநர் ஆர்.வி. உதயகுமார் உள்ளிட்ட 13 பேரின் பிரச்சாரப் பயணங்களுக்காக 17.37 லட்சம் ரூபாய் செலவிடப்பட்டுள்ளது. திருச்சி உள்ளிட்ட பல்வேறு இடங்களில் நடைபெற்ற பொதுக்கூட்டங்கள், மேடை ஒலிபெருக்கி அமைப்புகள் மற்றும் ராயப்பேட்டை கட்சி தலைமை அலுவலகச் செலவுகளுக்காக 1.28 கோடி ரூபாய் ஒதுக்கப்பட்டுள்ளது. வேட்பாளர்களின் குற்றப் பின்னணியை நாளிதழ்கள் மற்றும் செய்தி தொலைக்காட்சிகளில் விளம்பரப்படுத்த 2.78 கோடி ரூபாய் செலவிடப்பட்டுள்ளது.
இந்த செலவு அறிக்கையை அ.தி.மு.க பொதுச்செயலாளர் எடப்பாடி கே. பழனிசாமி உறுதிமொழி அளித்து கையொப்பமிட்டு தேர்தல் ஆணையத்திடம் தாக்கல் செய்துள்ளார். தேர்தல் ஆணையத்தின் விதிமுறைகளின்படி, வேட்பாளர்கள் தங்கள் தேர்தல் செலவினங்களை குறிப்பிட்ட காலக்கெடுவுக்குள் தாக்கல் செய்ய வேண்டும். தவறினால், அடுத்த மூன்று ஆண்டுகளுக்கு தேர்தலில் போட்டியிட தகுதி நீக்கம் செய்யப்படுவார்கள்.
அதே சமயம், 2026 சட்டப்பேரவைத் தேர்தலில் தி.மு.க தனது தேர்தல் பிரச்சாரத்திற்காக மொத்தம் 149 கோடி ரூபாயை செலவிட்டுள்ளதாக தகவல்கள் தெரிவிக்கின்றன. இதில், தேர்தல் விளம்பரங்களுக்காக மட்டும் 70.69 கோடி ரூபாய் செலவிடப்பட்டுள்ளது. மேலும், தி.மு.க நட்சத்திரப் பேச்சாளர்களின் பயணங்களுக்காக 5.90 கோடி ரூபாய் செலவிடப்பட்டுள்ளது. பல்வேறு வங்கி கணக்குகளில் இருந்து மொத்தம் 319 கோடி ரூபாய் செலவிடப்பட்டுள்ளதாக தி.மு.க தரப்பில் தேர்தல் ஆணையத்திடம் தெரிவிக்கப்பட்டுள்ளது.
நாம் தமிழர் கட்சியும் ஒரு கோடி ரூபாய்க்கும் அதிகமான தொகையை தேர்தல் பிரச்சாரத்திற்காக செலவு செய்துள்ளதாக தேர்தல் ஆணையத்திடம் தெரிவித்துள்ளது. தேர்தல் நேரங்களில் அரசியல் கட்சிகள் வசூலிக்கும் நிதி, வங்கிக் கணக்கு வரவு செலவு விவரங்கள் அனைத்தையும் தேர்தல் ஆணையத்திடம் தாக்கல் செய்வது கட்டாயமாகும்.
தனிநபர் வேட்பாளர்களின் தேர்தல் பிரச்சார செலவுகளுக்கு 40 லட்சம் ரூபாய் வரம்பு நிர்ணயிக்கப்பட்டுள்ளது. ஆனால், அரசியல் கட்சிகள் தங்கள் கட்சியின் விளம்பரங்கள் மற்றும் பரப்புரைக்காக செலவிடும் தொகைகளுக்கு அதிகபட்ச வரம்பு எதுவும் இல்லை என்பது குறிப்பிடத்தக்கது. இந்த வரம்பற்ற செலவு, தேர்தல் களத்தில் கட்சிகளின் நிதி வலிமையை வெளிப்படுத்துவதாக அமைந்துள்ளது.
