அரசியல் களத்தில் கருத்து வேறுபாடுகள் இருக்கலாம், ஆனால் தமிழ் மொழியின் பெருமைக்காக நாம் அனைவரும் ஒன்றிணைந்து நிற்க வேண்டும் என்று அதிமுக பொதுச் செயலாளர் எடப்பாடி பழனிசாமி வலியுறுத்தியுள்ளார். தமிழ்நாட்டில் நடைபெறும் நிகழ்ச்சிகளில் தமிழ்த்தாய் வாழ்த்து முதலில் பாடப்படுவதை அரசு உறுதி செய்ய வேண்டும் என்ற தனித்தீர்மானத்திற்கு அதிமுக தனது முழு ஆதரவை தெரிவித்துள்ளது.
அனைத்திந்திய அண்ணா திராவிட முன்னேற்றக் கழகத்தின் சார்பில், தமிழ்த்தாய் வாழ்த்து தொடர்பான அரசின் தனித்தீர்மானத்தை முழு மனதோடு ஆதரிப்பதாக எடப்பாடி பழனிசாமி தெரிவித்தார். தமிழ்மொழியின் பெருமையையும், தமிழர்களின் பண்பாட்டு அடையாளத்தையும் போற்றும் வகையில், தமிழ்நாட்டில் உள்ள அனைத்து கல்வி நிறுவனங்கள், பள்ளிக்கூடங்கள், கல்லூரிகள், அரசு அலுவலகங்கள், பொது நிறுவனங்கள் மற்றும் பொது அமைப்புகளின் நிகழ்ச்சிகள் தொடங்குவதற்கு முன்பு, தமிழ்த்தாய் வாழ்த்து கட்டாயமாக முதலில் பாடப்பட வேண்டும் என்பது உலகம் முழுவதும் வாழும் தமிழர்களின் உணர்வு என்று அவர் குறிப்பிட்டார்.
தமிழ்த்தாய் வாழ்த்து என்பது வெறும் பாடல் அல்ல என்றும், அது தமிழ்மொழியின் தொன்மையையும், பெருமையையும், தமிழர்களின் பண்பாட்டு அடையாளத்தையும் வெளிப்படுத்துவதாகவும் எடப்பாடி பழனிசாமி கூறினார். மேலும், இது உலகம் முழுவதும் வாழும் தமிழர்களை உணர்வால் ஒருங்கிணைக்கும் ஒரு அடையாளமாகவும் திகழ்கிறது என்றும் அவர் தெரிவித்தார்.
தமிழ்மொழியின் வளர்ச்சிக்கும், தமிழ்நாட்டின் மற்றும் தமிழர்களின் பண்பாட்டு அடையாளத்தைப் பாதுகாப்பதற்கும் அனைத்திந்திய அண்ணா திராவிட முன்னேற்றக் கழகம் வரலாற்றுச் சிறப்புமிக்க பல பணிகளைச் செய்துள்ளது என்பதை அவர் சுட்டிக்காட்டினார். திமுகவும் உலகத் தமிழ் மாநாடுகளை நடத்தி, தமிழின் பெருமையை உலக அரங்கிற்கு கொண்டு சென்றதையும் அவர் நினைவு கூர்ந்தார். தமிழ்மொழி தொடர்பான ஆய்வுகள், கருத்தரங்குகள் மற்றும் பல்வேறு நிறுவனங்களின் செயல்பாடுகள் ஊக்குவிக்கப்பட்டன என்றும், தமிழர்களின் வரலாறும், பண்பாடும் உலக அளவில் அறிமுகப்படுத்தப்பட்டன என்றும் அவர் கூறினார்.
தமிழ்த்தாய் வாழ்த்து என்பது எந்த மொழிக்கும், எந்த இனத்திற்கும், எந்த மதத்திற்கும் எதிரானது அல்ல என்றும், தமிழர்கள் தங்களுடைய தாய்மொழிக்குச் செலுத்தும் மரியாதையும் வணக்கமும்தான் தமிழ்த்தாய் வாழ்த்து என்றும் எடப்பாடி பழனிசாமி விளக்கினார். நாம் இந்தியர்கள் என்பதில் பெருமை கொள்வதைப் போலவே, நாம் தமிழர்கள் என்பதிலும் பெருமை கொள்கிறோம் என்றும், இந்தியத் தன்மையும், தமிழர் அடையாளமும் ஒன்றுக்கொன்று எதிரானவை அல்ல என்றும் அவர் குறிப்பிட்டார்.
அரசியல் களத்தில் ஆயிரம் கருத்து வேறுபாடுகள் இருக்கலாம். ஆனால், தமிழ் என்று வரும்போது நாம் அனைவரும் தமிழர்கள். தமிழ்மொழியின் உரிமை, வளர்ச்சி மற்றும் பெருமை என்று வரும்போது, இந்தப் பேரவை ஒரே குரலில் நிற்க வேண்டும் என்று அவர் வலியுறுத்தினார். அந்த அடிப்படையில், தமிழ்நாட்டில் அமைந்துள்ள அனைத்து கல்வி நிறுவனங்கள், பள்ளிக்கூடங்கள், கல்லூரிகள், அரசு அலுவலகங்கள், பொது நிறுவனங்கள் மற்றும் பொது அமைப்புகளின் நிகழ்ச்சிகள் தொடங்குவதற்கு முன்பு தமிழ்த்தாய் வாழ்த்து கட்டாயமாகப் பாடப்பட வேண்டும் என்ற இந்த அரசின் தனித்தீர்மானத்தை, அனைத்திந்திய அண்ணா திராவிட முன்னேற்றக் கழகத்தின் சார்பாக முழு மனதோடு ஆதரிப்பதாக அவர் தெரிவித்தார்.
இறுதியாக, 'தமிழ் வாழ்க! தமிழர் வாழ்க! தமிழ்நாடு வாழ்க!' என்று முழக்கமிட்டு தனது உரையை நிறைவு செய்தார்.
