நடிகர் ஜெயம் ரவியின் மனைவி ஆர்த்தி தரப்பில், அவரது தாயார் செய்தியாளர்களிடம் கண்ணீர்மல்க பேட்டியளித்துள்ளார். இந்த வழக்கில் நீதிபதி வழங்கிய தீர்ப்பு தங்களுக்கு மிகப்பெரிய நியாயத்தை அளித்துள்ளதாக அவர் தெரிவித்தார். தற்போது வந்துள்ள தீர்ப்பின்படி, ஆர்த்தி, ஜெயம் ரவி மற்றும் அவர்களது இரண்டு மகன்கள் மாதத்தில் ஒருமுறை சனி மற்றும் ஞாயிற்றுக்கிழமைகளில் சந்திக்க வேண்டும். இது தங்களுக்கு கிடைத்திருக்கும் மிகப்பெரிய நியாயம் என அவர் குறிப்பிட்டுள்ளார்.
கடந்த இரண்டு ஆண்டுகளாக இந்த பிரச்சனையை சரிசெய்யவும், குடும்பத்தினர் அனைவரும் ஒன்றுசேர்ந்து பேசவும் பலமுறை முயற்சி செய்ததாகவும், ஆனால் அதற்கான வாய்ப்பு கிடைக்கவில்லை என்றும் அவர் வேதனை தெரிவித்தார். இந்த வாய்ப்பை வழங்கிய நீதிபதிக்கு அவர் மனமார்ந்த நன்றியைத் தெரிவித்துக் கொண்டார். எந்த தாயும் தன் பிள்ளைகளைப் பிரிக்க நினைக்க மாட்டார்கள் என்றும், திருட்டுத்தனமாக எந்த திருமணமும் நடைபெறவில்லை என்றும் அவர் கூறினார். 10,000 பேரை அழைத்து, 10 நிகழ்ச்சிகள் நடத்தி திருமணம் செய்துகொண்ட நிலையில், தாங்கள் ஏன் பிள்ளைகளைப் பிரிக்க நினைக்க வேண்டும் என அவர் கேள்வி எழுப்பினார்.
'மாமியார்' என்ற ஒரே காரணத்திற்காக தான் நல்லவளாக இல்லாமல் போய்விட முடியாது என்றும், நடிகர் ஜெயம் ரவி பலமுறை பேட்டிகளில் தன்னை 'என் மாமியார் இல்லை, என் அம்மா' என்று கூறியுள்ளதை சுட்டிக்காட்டினார். அவர் இன்னும் தனது தோழியுடன் தான் இருக்கிறார் என்றும், அவர்கள் தமிழ்நாட்டை விட்டு எங்கும் செல்லவில்லை என்றும் அவர் தெரிவித்தார்.
ஆர்த்தி தனியாக 40 லட்சம் ரூபாய் ஜீவனாம்சம் கேட்டதாக கூறப்படுவது பொய் என்றும், குழந்தைகளின் படிப்புச் செலவு, உணவு, கடன் போன்ற அனைத்தையும் சேர்த்துதான் இந்தத் தொகை கேட்கப்பட்டதாகவும் அவர் விளக்கினார். குழந்தைகளைப் பார்க்கக்கூடாது என்று தாங்கள் ஒருபோதும் சொல்லவில்லை என்றும் அவர் தெளிவுபடுத்தினார்.
மேலும், முதலமைச்சர் விஜயின் மகன் ஜேசன் சஞ்சய் அளித்த ஒரு பேட்டியைக் கண்டு தான் அழுததாகக் கூறிய ஆர்த்தியின் தாயார், தனது தந்தையைப் பற்றி ஜேசன் சஞ்சய் எவ்வளவு பெருமையாகப் பேசுகிறார் என்பதைப் பார்த்து நெகிழ்ந்து போனதாகக் கண்ணீருடன் தெரிவித்தார்.
