ஐந்து இளைஞர்களின் வாழ்க்கையில் ஒரு மர்மமான கற்பனை விளையாட்டு ஏற்படுத்தும் தாக்கத்தை மையமாக வைத்து 'டே 11' திரைப்படம் உருவாகியுள்ளது. அவர்கள் விளையாடத் தொடங்கும் ஆசைகள் அனைத்தும் உடனடியாக நிறைவேறுகின்றன. ஆனால், அந்த விளையாட்டுக்கு பின்னால் மறைந்திருக்கும் இருண்ட ரகசியம் வெளிப்படும்போது, அவர்களில் ஒருவரின் வாழ்க்கை ஆபத்தில் சிக்குகிறது. அதன் பிறகு நடக்கும் எதிர்பாராத சம்பவங்களே படத்தின் மீதிக்கதை.
மனோஜ் மேடி, சுவேதா அபிராமி, ஆதர்ஷ், அபிமன்யு, ரவி சந்திரன் ஆகிய ஐந்து முக்கிய கதாபாத்திரங்களில் நடித்துள்ள இளைஞர்களின் நடிப்பு படத்திற்கு பலம் சேர்த்துள்ளது. இயல்பான நடிப்பால் ரசிகர்களைக் கவர்ந்துள்ளனர். அறிமுக இயக்குநர் ஸ்ரீதிகா, பேண்டஸி திரில்லர் வகையை மையமாக வைத்து ஒரு புதிய கான்செப்ட்டை முயற்சித்துள்ளார். ஆரம்பத்தில், கேம் உலகம் மற்றும் கதாபாத்திரங்களின் அறிமுகம் சுவாரஸ்யமாக அமைந்திருந்தாலும், படம் முழுவதும் அந்தத் தீவிரம் தொடர்ந்து நீடிக்கவில்லை என்பது ஒரு குறையாகும்.
குறிப்பாக, சில காட்சிகளில் சஸ்பென்ஸ் பில்ட்-அப் சிறப்பாக வேலை செய்துள்ளது. பேண்டஸி கூறுகள் மற்றும் யதார்த்தம் இணையும் காட்சிகள் படத்திற்கு ஒரு வித்தியாசமான உணர்வைக் கொடுக்கின்றன. இருப்பினும், திரைக்கதை நேர்மாறாக நகர்வதால், பல இடங்களில் படம் மெதுவாகச் செல்வது போன்ற உணர்வு ஏற்படுகிறது. சில திருப்பங்கள் கணிக்கக் கூடியதாக இருப்பது படத்தின் வேகத்தைக் குறைக்கிறது. உணர்ச்சிகரமான காட்சிகள் இன்னும் வலுவாக இருந்திருக்கலாம்.
கிளைமாக்ஸில் சொல்லப்படும் கருத்து ஒரு நல்ல முயற்சியாக இருந்தாலும், அதை வெளிப்படுத்திய விதம் முழுமையான தாக்கத்தை ஏற்படுத்தவில்லை. செல்வாவின் ஒளிப்பதிவும், அனிலின் இசையும் படத்தின் திரைக்கதை ஓட்டத்திற்கு பெரிதும் உதவியுள்ளது. மொத்தத்தில், 'டே 11' ஒரு புதிய முயற்சியாக இருந்தாலும், சில குறைகளால் முழுமையான தாக்கத்தை ஏற்படுத்தத் தவறியுள்ளது.
