மொபைல் போன் பயனர்களே உஷார்! உங்கள் வங்கி கணக்குகளை குறிவைத்து செயல்படும் மர்ம கும்பல் ஒன்று, ஆபத்தான ஆபாச செயலிகள் மூலம் பணத்தை கொள்ளையடிக்கும் புதிய மோசடியில் ஈடுபட்டுள்ளது. இது குறித்து மத்திய உள்துறை அமைச்சகம் தீவிர எச்சரிக்கை விடுத்துள்ளது.
இந்திய சைபர் குற்ற ஒருங்கிணைப்பு மையத்தின் தேசிய சைபர் குற்ற அச்சுறுத்தல் பகுப்பாய்வு பிரிவு வெளியிட்டுள்ள அறிக்கையின்படி, பேஸ்புக், இன்ஸ்டாகிராம் போன்ற சமூக ஊடகங்களில் வரும் விளம்பரங்கள் மூலம் ஆபத்தான ஆபாச செயலிகள் பரப்பப்படுகின்றன. இந்த செயலிகளை 'கிளிக்' செய்யும் பயனர்கள், சில ஆபாச இணையதளங்களுக்கு அழைத்துச் செல்லப்பட்டு, அங்கு நம்பவைக்கப்பட்டு, கூகுள் பிளே ஸ்டோருக்கு வெளியே இருந்து சில செயலிகளை பதிவிறக்கம் செய்ய தூண்டப்படுகின்றனர்.
குறிப்பாக, 'நைட் பிளே, ரீலுாப், கிஸ், விமோ, ரிவோ, நெக்ஸோ, விக்ஸா' போன்ற பெயர்களில் உலாவும் இந்த ஆபத்தான செயலிகள், மொபைல் போனில் நிறுவப்பட்டவுடன், அதன் முக்கிய கட்டுப்பாடுகளை இயக்குவதற்கான அனுமதிகளை கேட்கின்றன. ஆண்ட்ராய்டு போன்களில் உள்ள 'அக்செசிபிலிட்டி' எனப்படும் சிறப்பு அனுமதியைப் பெற்று, பின்புலத்தில் இயங்கத் தொடங்குகின்றன.
இந்த அனுமதியைப் பெற்றவுடன், மர்ம நபர்கள் பயனரின் மொபைல் போனை முழுமையாக தங்கள் கட்டுப்பாட்டுக்குள் கொண்டு வந்து விடுகின்றனர். இதன் மூலம், பயனருக்குத் தெரியாமலேயே அவரது வங்கி கணக்குகளில் இருந்து பணப் பரிவர்த்தனைகளை மேற்கொண்டு பணத்தை கொள்ளையடிக்கின்றனர். மேலும், இந்த செயலிகள் 'அப்டேட்' என்ற பெயரில் மற்றொரு தீம்பொருளான 'மால்வார்' ஒன்றை பதிவிறக்கம் செய்து, மொபைல் போனில் உள்ள ஒட்டுமொத்த தரவுகளையும் திருடி விடுகின்றன.
எனவே, ஆண்ட்ராய்டு மொபைல் போன் பயனர்கள் செயலிகளை எப்போதும் 'கூகுள் பிளே ஸ்டோர்' அல்லது அங்கீகரிக்கப்பட்ட தளங்களில் இருந்து மட்டுமே பதிவிறக்கம் செய்ய வேண்டும். விளம்பரங்கள் அல்லது சந்தேகத்திற்கிடமான இணைப்புகள் வழியாக வரும் செயலிகளை முற்றிலுமாகத் தவிர்க்க வேண்டும். முன்பின் தெரியாத செயலிகளுக்கு 'அக்செசிபிலிட்டி' அனுமதியை ஒருபோதும் வழங்கக் கூடாது.
தங்கள் மொபைல் போன்களில் உள்ள செயலிகளை தொடர்ந்து கண்காணித்து, தேவையில்லாத அல்லது அறிமுகமில்லாத செயலிகளை உடனடியாக நீக்க வேண்டும். மேலும், மொபைல் போனில் 'கூகுள் பிளே புரொடெக்ட்' எனப்படும் பாதுகாப்பு வசதியை இயங்கும் நிலையில் வைத்திருக்க வேண்டும். மொபைல் போன் மென்பொருளை உடனுக்குடன் அப்டேட் செய்வதும் அவசியம்.
வங்கி மற்றும் யு.பி.ஐ. எனப்படும் ஒருங்கிணைந்த பணப்பரிவர்த்தனை தளத்தின் கணக்குகளை தொடர்ந்து சரிபார்த்து வருவதுடன், ஏதேனும் சந்தேகத்திற்கிடமான பரிவர்த்தனைகள் நடந்தால் உடனடியாக 1930 என்ற தேசிய உதவி எண்ணிலோ அல்லது www.cybercrime.gov.in என்ற அதிகாரப்பூர்வ சைபர் குற்ற புகார் இணையதளத்திலோ புகார் அளிக்கலாம் என மத்திய உள்துறை அமைச்சகம் அறிவுறுத்தியுள்ளது.
**செயலிகளை அகற்றுவது எப்படி?**
* பயனர்கள் தங்கள் ஆண்ட்ராய்டு மொபைல் போனை 'சேப் மோடு' எனப்படும் பாதுகாப்பான பயன்முறையில் ரீஸ்டார்ட் செய்யலாம்.
* பின்னர், அமைப்புகள் (Settings) என்ற பிரிவில் உள்ள செயலிகள் (Apps) பகுதிக்குச் சென்று சந்தேகத்திற்கிடமான செயலிகளை நீக்கலாம்.
* சாதனத்தை ரீஸ்டார்ட் செய்த பிறகும் ஒரு செயலியை அகற்றவோ அல்லது மீண்டும் கொண்டு வரவோ முடியாவிட்டால், பயனர்கள் தங்களின் முக்கியமான தரவுகளை எடுத்து வைத்துக் கொண்டு, போனை 'பேக்டரி ரீசெட்' செய்யலாம்.
