மும்பையைச் சேர்ந்த டெல்லி கேப்பிட்டல்ஸ் அணியின் நட்சத்திர கிரிக்கெட் வீரரான அபிஷேக் போரலுக்கு, பாலியல் வன்கொடுமை வழக்கில் சுமார் 36 நாட்கள் சிறைவாசத்திற்குப் பிறகு வியாழக்கிழமை ஜாமீன் வழங்கப்பட்டுள்ளது. இதனால், அவர் வெள்ளிக்கிழமை சிறையிலிருந்து விடுவிக்கப்பட வாய்ப்புள்ளதாக தகவல்கள் தெரிவிக்கின்றன.
திருமணம் செய்து கொள்வதாகக் கூறி உடலுறவு கொண்டதாகவும், பின்னர் நெருக்கமான புகைப்படங்களை வெளியிடுவதாக மிரட்டி பிளாக்மெயில் செய்ததாகவும் மருத்துவக் கல்லூரி மாணவி ஒருவர் அளித்த புகாரின் பேரில் அபிஷேக் போரல் மீது வழக்குப்பதிவு செய்யப்பட்டது. இந்த புகாரின் அடிப்படையில், கடந்த ஆகஸ்ட் 11 ஆம் தேதி அவர் கைது செய்யப்பட்டார். அவரது மீது தகவல் தொழில்நுட்ப சட்டத்தின் பிரிவுகள் 66E மற்றும் 72 உட்பட பல்வேறு ஜாமீனில் வெளிவர முடியாத பிரிவுகளின் கீழ் மக்ரா காவல் நிலையத்தில் வழக்கு பதிவு செய்யப்பட்டது.
இந்த வழக்கு கொல்கத்தா உயர் நீதிமன்றத்தில் நீதிபதி சௌகத் பட்டாச்சார்யா முன்னிலையில் விசாரணைக்கு வந்தது. அப்போது, போரலை கைது செய்த விவரத்தை மக்ரா போலீசார் நீதிமன்றத்தில் தெரிவித்தனர். பின்னர் அவர் சின்சுரா நீதிமன்றத்தில் ஆஜர்படுத்தப்பட்டார். அப்போது, அபிஷேக் போரலிடம் இருந்த மொபைல் மற்றும் பிற மின்னணு சாதனங்களை ஆய்வு செய்ய போலீசாருக்கு நீதிமன்றம் உத்தரவிட்டது.
கைது செய்யப்படுவதற்கு முன்பு, தன் மீதான அனைத்து குற்றச்சாட்டுகளையும் அபிஷேக் போரல் திட்டவட்டமாக மறுத்திருந்தார். இந்த வழக்கின் விசாரணை தொடர்பாக, போரலின் நண்பர் ஒருவரையும் மற்றொரு பெண்ணையும் போலீசார் ஏற்கனவே கைது செய்து விசாரணை நடத்தி வருகின்றனர்.
வியாழக்கிழமை சின்சுரா நீதிமன்றம் ஜாமீன் வழங்கிய போதிலும், சிறை நடைமுறைகள் காரணமாக அவர் உடனடியாக விடுவிக்கப்படவில்லை. விஸ்வகர்மா பூஜை தினமான வெள்ளிக்கிழமை அவர் சிறையிலிருந்து வெளியே வர வாய்ப்புள்ளதாக தெரிகிறது. இந்த ஜாமீன் செய்தி அவரது ரசிகர்களிடையே பெரும் எதிர்பார்ப்பை ஏற்படுத்தியுள்ளது.
