இலங்கையில் நடைபெற்ற காமன்வெல்த் செஸ் சாம்பியன்ஷிப் போட்டியில் தமிழக வீரர்கள் சிறப்பான ஆட்டத்தை வெளிப்படுத்தி பதக்கங்களை வென்றுள்ளனர். இந்தியா, இலங்கை, ஆஸ்திரேலியா, நியூசிலாந்து உள்ளிட்ட 14 நாடுகளைச் சேர்ந்த வீரர்கள் இதில் பங்கேற்றனர். ரேபிட், பிளிட்ஸ், கிளாசிக் என மூன்று பிரிவுகளில் இந்தப் போட்டிகள் நடைபெற்றன.
ஓபன் பிரிவில் மொத்தம் 96 வீரர்கள் பங்கேற்ற நிலையில், தமிழகத்தைச் சேர்ந்த கிராண்ட்மாஸ்டர் இனியன், ரேபிட் மற்றும் பிளிட்ஸ் பிரிவுகளில் தலா 6.5 புள்ளிகள் பெற்று தங்கப் பதக்கங்களை வென்று அசத்தினார். அவரது திறமையான ஆட்டம் அனைவரையும் கவர்ந்தது.
இளம் வீரர்களான தமிழ் அமுதன் மற்றும் மேஹா அரின் ஆகியோரும் தங்கப் பதக்கங்களை வென்று தமிழகத்திற்கு பெருமை சேர்த்துள்ளனர். 10 வயதுக்குட்பட்டவர்களுக்கான ஓபன் பிரிவில் 'ரேபிட், பிளிட்ஸ், கிளாசிக்கல்' ஆகிய மூன்று பிரிவுகளிலும் தமிழ் அமுதன் தங்கத்தைக் கைப்பற்றினார். மேலும், 12 வயதுக்குட்பட்ட பெண்களுக்கான ரேபிட் பிரிவில் மேஹா அரின் தங்கப் பதக்கத்தை சொந்தமாக்கினார்.
ஹாட்சன் செஸ் அகாடமியில் பயிற்சி பெற்று வரும் தமிழ் அமுதன் மற்றும் மேஹா அரின், இந்த வெற்றியின் மூலம் தங்கள் பயிற்சிக்குக் கிடைத்த அங்கீகாரமாக இதைக் கருதுகின்றனர். காமன்வெல்த் செஸ் போட்டிகளில் தமிழக வீரர்களின் இந்த வெற்றி, மாநிலத்திற்குப் பெருமை சேர்த்துள்ளது.
