ஐபிஎல் கிரிக்கெட் தொடரில் இன்று லக்னோவில் நடைபெறும் 59-வது லீக் ஆட்டத்தில் சென்னை சூப்பர் கிங்ஸ் அணி, லக்னோ சூப்பர் ஜெயன்ட்ஸை எதிர்கொள்கிறது. இரவு 7.30 மணிக்கு தொடங்கும் இந்த போட்டி, சென்னை அணியின் அடுத்த சுற்று வாய்ப்பை தீர்மானிக்கும் முக்கிய ஆட்டமாக பார்க்கப்படுகிறது.
சென்னை அணி இதுவரை விளையாடிய 11 போட்டிகளில் 6 வெற்றிகளைப் பெற்று 12 புள்ளிகளுடன் 5-வது இடத்தில் உள்ளது. ராஜஸ்தான், பஞ்சாப், பெங்களூரு, ஐதராபாத், குஜராத் அணிகளிடம் தோல்வியடைந்தாலும், டெல்லி, கொல்கத்தா, மும்பை, லக்னோ அணிகளுக்கு எதிராக வெற்றிக் கொடி நாட்டியுள்ளது. குறிப்பாக, கடைசி மூன்று போட்டிகளில் தொடர்ச்சியாக வென்றுள்ள சென்னை அணி, இந்த உத்வேகத்தை பயன்படுத்தி 7-வது வெற்றியைப் பதிவு செய்யும் முனைப்பில் உள்ளது. இருப்பினும், ஜாமி ஓவர்டான் காயமடைந்து விலகியுள்ளது அணிக்கு பின்னடைவை ஏற்படுத்தியுள்ளது.
மறுபுறம், லக்னோ சூப்பர் ஜெயன்ட்ஸ் அணி 11 போட்டிகளில் விளையாடி வெறும் 3 வெற்றிகளை மட்டுமே பெற்றுள்ளது. ஐதராபாத், கொல்கத்தா, பெங்களூரு அணிகளுக்கு எதிராக வென்றாலும், மற்ற போட்டிகளில் தோல்வியையே தழுவியுள்ளது. கடைசி 8 போட்டிகளில் ஒன்றில் மட்டுமே வெற்றி பெற்றுள்ள லக்னோ, பிளே-ஆஃப் சுற்றை இழந்துவிட்டதுடன், புள்ளி பட்டியலில் கடைசி இடத்தில் பரிதவித்து வருகிறது. இருப்பினும், சென்னைக்கு எதிரான முந்தைய ஆட்டத்தில் 5 விக்கெட் வித்தியாசத்தில் தோல்வியடைந்ததன் காரணமாக, இந்த முறை பதிலடி கொடுத்து ஆறுதல் வெற்றியுடன் புள்ளி பட்டியலில் கடைசி இடத்தை தவிர்க்க போராடும்.
சென்னை அணி 4 நாள் இடைவெளிக்குப் பிறகு மீண்டும் லக்னோவை சந்திப்பதால், கூடுதல் நம்பிக்கையுடன் களம் இறங்கும். இனிவரும் போட்டிகளில் வெற்றி பெற்று அடுத்த சுற்று வாய்ப்பை வலுப்படுத்த சென்னை அணி கடுமையாக முயற்சிக்கும். அதே சமயம், இனி இழப்பதற்கு எதுவும் இல்லை என்பதால், லக்னோ அணியும் அச்சமின்றி விளையாடி சென்னைக்கு கடும் போட்டியை கொடுக்கும். இதனால், இந்த ஆட்டம் விறுவிறுப்பாக அமையும் என எதிர்பார்க்கப்படுகிறது. இதுவரை இரு அணிகளும் 7 முறை மோதியுள்ளன, இதில் தலா 3 வெற்றிகளைப் பெற்று சமநிலையில் உள்ளன. ஒரு போட்டி முடிவுறாமல் போனது.
போட்டிக்கான உத்தேச அணிகள்:
சென்னை: சஞ்சு சாம்சன், ருதுராஜ் கெய்க்வாட் (கேப்டன்), உர்வில் பட்டேல், கார்த்திக் ஷர்மா, டிவால்ட் பிரேவிஸ், ஷிவம் துபே, பிரசாந்த் வீர், அகில் ஹூசைன், நூர் அகமது, அன்ஷூல் கம்போஜ், ஸ்பென்சர் ஜான்சன் அல்லது மேட் ஹென்றி, முகேஷ் சவுத்ரி.
லக்னோ: ஜோஷ் இங்லிஸ், மிட்செல் மார்ஷ், நிகோலஸ் பூரன், ரிஷப்பண்ட் (கேப்டன்), மார்க்ரம், அக்ஷத் ரகுவன்ஷி, ஷபாஸ் அகமது, ஹிம் மாத் சிங், முகமது ஷமி, ஆவேஷ் கான், பிரின்ஸ் யாதவ், மொஷின் கான் அல்லது திக்வேஷ் ரதி.
