தமிழகத்தில் சேவல் சண்டைக்கு தடை விதித்து காவல்துறை டிஜிபி வெளியிட்ட சுற்றறிக்கை குறித்து சென்னை உயர்நீதிமன்றம் முக்கிய கேள்விகளை எழுப்பியுள்ளது. சேவல் சண்டைக்கு தடை விதிக்க டிஜிபிக்கு என்ன அதிகாரம் உள்ளது என நீதிபதி வி.லட்சுமிநாரயணன் தலைமையிலான அமர்வு கேள்வி எழுப்பியுள்ளது.
கடந்த 2025-ஆம் ஆண்டு செப்டம்பர் மாதம், தமிழகத்தில் சேவல் சண்டைக்கு தடை விதித்து காவல்துறை டிஜிபி ஒரு சுற்றறிக்கையை வெளியிட்டிருந்தார். இந்த சுற்றறிக்கையை எதிர்த்தும், ஈரோடு மற்றும் நாமக்கல் மாவட்டங்களில் நடைபெறும் கோயில் திருவிழாக்களில் சேவல் சண்டை நடத்த அனுமதி கோரியும் ஈரோட்டைச் சேர்ந்த ஆர்.அருண்குமார் என்பவர் சென்னை உயர்நீதிமன்றத்தில் வழக்கு தொடர்ந்தார்.
இந்த வழக்கு விசாரணைக்கு வந்தபோது, மிருகவதை தடுப்பு சட்டம் மற்றும் சென்னை உயர்நீதிமன்றம், உயர்நீதிமன்ற மதுரை அமர்வு ஆகியவை பிறப்பித்த பல்வேறு உத்தரவுகளின் அடிப்படையிலேயே இந்த சுற்றறிக்கை வெளியிடப்பட்டதாக அரசு தரப்பில் பதிலளிக்கப்பட்டது.
இதனைக் கேட்டறிந்த நீதிபதி வி.லட்சுமிநாரயணன், காவல்துறைக்கு எண்ணற்ற பணிகள் இருக்கும் நிலையில், எங்கு ஆடு சண்டை நடக்கிறது, எங்கு சேவல் சண்டை நடக்கிறது என்பதை கண்காணிப்பதுதான் அவர்களது முக்கிய வேலையா? என காட்டமாக கேள்வி எழுப்பினார்.
மேலும், சேவல் சண்டைக்கு தடை விதித்து சுற்றறிக்கை பிறப்பிக்க டிஜிபிக்கு என்ன அதிகாரம் உள்ளது என்றும் நீதிமன்றம் கேள்வி எழுப்பியது.
இந்த வழக்கு தொடர்பாக, டிஜிபி மற்றும் மத்திய அரசு பதிலளிக்க உத்தரவிட்ட நீதிபதி, வழக்கின் அடுத்தகட்ட விசாரணையை செப்டம்பர் 7 ஆம் தேதிக்கு ஒத்திவைத்து உத்தரவிட்டார்.
சேவல் சண்டைக்கு தடை விதிக்கும் அதிகாரம் காவல்துறை டிஜிபிக்கு உள்ளதா என்பது குறித்தும், கோயில் திருவிழாக்களில் சேவல் சண்டைக்கு அனுமதி வழங்கப்படுமா என்பது குறித்தும் நீதிமன்றம் முக்கியத்துவம் அளித்து விசாரணையை மேற்கொண்டு வருகிறது.
இந்த வழக்கு தீர்ப்பு, தமிழகத்தில் சேவல் சண்டைகள் நடத்தப்படுவது தொடர்பாக ஒரு முக்கிய வழிகாட்டுதலை வழங்கும் என எதிர்பார்க்கப்படுகிறது.
