மேற்கு டெல்லியில் உள்ள பாஜக அலுவலகத்தில், அக்கட்சியின் மண்டல தலைவர் சுனில் குமார், எம்.எல்.ஏ கஜேந்திர தாரலால் கொடூரமாகத் தாக்கப்பட்டதாகக் குற்றச்சாட்டு எழுந்துள்ளது. இது டெல்லி அரசியலில் பெரும் பரபரப்பை ஏற்படுத்தியுள்ளது.
கன்ஜாவ்லா பகுதியின் பாஜக தலித் மண்டலத் தலைவராகப் பணியாற்றி வரும் சுனில் குமார், கடந்த வியாழக்கிழமை மாலை வாக்காளர் பட்டியல் தொடர்பாக ஆலோசனை நடத்த வேண்டும் என்ற அழைப்பின் பேரில், எம்.எல்.ஏ கஜேந்திர தாரலின் பாஜக அலுவலகத்திற்குச் சென்றுள்ளார். அங்கு சென்றதும், அலுவலகத்தில் இருந்த சிசிடிவி கேமராக்கள் அணைக்கப்பட்டு, கதவுகள் உட்புறமாகப் பூட்டப்பட்டதாக அவர் தெரிவித்துள்ளார்.
பின்னர், விடிய விடிய தன்னைச் சிறைபிடித்து வைத்து, பெல்ட், தடி மற்றும் பிளாஸ்டிக் குழாய்களைப் பயன்படுத்தி கொடூரமாகத் தாக்கியதாக சுனில் குமார் வீடியோ மூலம் புகார் தெரிவித்துள்ளார். மேலும், தன்னைச் சாதிய ரீதியாகவும், ஆபாச வார்த்தைகளாலும் வசைபாடியதாகவும் அவர் குறிப்பிட்டுள்ளார்.
இந்தத் தாக்குதலால் தன் உடல் முழுவதும் ஏற்பட்ட கன்றிப்போன தழும்புகளையும், நீல நிறக் காயங்களையும் சுனில் குமார் சமூக வலைத்தளங்களில் புகைப்படங்களாக வெளியிட்டுள்ளார். இது தொடர்பாக டெல்லி காவல்துறையில் எழுத்துப்பூர்வமாகப் புகார் அளித்தும், இதுவரை முதல் தகவல் அறிக்கை (FIR) பதிவு செய்யப்படவில்லை என்றும் அவர் குற்றம் சாட்டியுள்ளார்.
இந்தச் சம்பவம் குறித்து ஆம் ஆத்மி கட்சி கடுமையாக விமர்சித்துள்ளது. அக்கட்சியின் மூத்த தலைவர் குல்தீப் குமார் கூறுகையில், 'பாஜக ஆட்சியில் அவர்களது சொந்தக் கட்சியின் தலித் பிரிவு மண்டலத் தலைவருக்கே பாதுகாப்பு இல்லை. பாஜக அலுவலகத்திற்குள்ளேயே வைத்து ஒரு தலித் நிர்வாகி கொடூரமாகத் தாக்கப்பட்டுள்ளார்' என்று சாடியுள்ளார்.
பாதிக்கப்பட்ட சுனில் குமாருக்கு ஆதரவாகக் குரல் கொடுத்துள்ள ஆம் ஆத்மி கட்சி, தலித் ஊழியரைத் தாக்கியதாகக் கூறப்படும் எம்.எல்.ஏ கஜேந்திர தாரலை உடனடியாக பாஜகவில் இருந்து நீக்க வேண்டும் என்றும், அவர் மீது எஸ்சி/எஸ்டி வன்கொடுமைத் தடுப்புச் சட்டத்தின் கீழ் வழக்குப் பதிவு செய்து உடனடியாகச் சிறையில் அடைக்க வேண்டும் என்றும் கோரிக்கை விடுத்துள்ளது.
இந்தச் சம்பவம், அரசியல் கட்சி அலுவலகங்களில் நடக்கும் வன்முறைகள் மற்றும் சாதிய ரீதியான தாக்குதல்கள் குறித்த கேள்விகளை எழுப்பியுள்ளது. பாதிக்கப்பட்ட சுனில் குமாரின் புகார் மீது காவல்துறை உரிய நடவடிக்கை எடுக்குமா என்ற எதிர்பார்ப்பு எழுந்துள்ளது.
