சிலரது வாயில் இருந்து வரும் துர்நாற்றம், மற்றவர்களிடம் பேசுவதற்கே கூச்சத்தை ஏற்படுத்தும். இதனால் அவர்கள் மிகுந்த சிரமத்திற்கு ஆளாகின்றனர். இந்த துர்நாற்றத்திற்கான காரணங்களை அறிந்து, அந்த உணவுகளை தவிர்ப்பதன் மூலமோ அல்லது சாப்பிட்ட பிறகு வாயை சுத்தப்படுத்துவதன் மூலமோ இதை சரிசெய்யலாம். இது குறித்த விரிவான தகவல்களை இந்தக் கட்டுரையில் காண்போம்.
இறைச்சி உணவுகள் வாய் துர்நாற்றத்திற்கு ஒரு முக்கிய காரணமாக அமைகின்றன. இறைச்சியில் உள்ள புரதச்சத்து, நுண்ணுயிரிகளான பாக்டீரியாக்களுக்கு மிகவும் பிடித்தமான உணவாகும். இறைச்சியை உட்கொள்ளும்போது, அதில் உள்ள புரதத்தை பாக்டீரியாக்கள் அம்மோனியா கூட்டுப்பொருட்களாக சிதைக்கின்றன. இந்த சிதைவின் விளைவாக வாயில் துர்நாற்றம் ஏற்படுகிறது.
சில வகை பழங்களும் வாய் துர்நாற்றத்தை உண்டாக்கும். குறிப்பாக ஆரஞ்சு, சாத்துக்குடி, எலுமிச்சை போன்ற சிட்ரிக் வகை பழங்கள் பாக்டீரியாக்களுக்கு சாதகமான சூழலை உருவாக்குகின்றன. அதிக அளவில் இப்பழங்களை உட்கொள்வதும் வாய் துர்நாற்றத்திற்கு வழிவகுக்கும். மேலும், நாம் அன்றாடம் உண்ணும் மீன்களில் டிரைமெத்தில் அமினோக்கள் என்ற கூட்டுப்பொருள் உள்ளது. இது அதிக நாற்றத்தை ஏற்படுத்தும் தன்மை கொண்டது. இந்த மீனை சாப்பிட்ட பிறகும், அதன் நாற்றம் வெகு நேரம் வாயில் தங்கி துர்நாற்றத்தை உண்டாக்கும்.
பால் பொருட்களும் வாய் துர்நாற்றத்திற்கு காரணமாகலாம். பால் பொருட்களில் உள்ள அமினோ அமிலங்கள், பாக்டீரியாக்கள் வளர்வதற்கு ஏற்ற சூழலை அளிக்கின்றன. இந்த பாக்டீரியாக்கள் வெளியிடும் ஹைட்ரஜன் சல்பைடு என்ற வாயு, வாய் துர்நாற்றத்தை ஏற்படுத்துகிறது. வாய் துர்நாற்றத்தை முற்றிலுமாகப் போக்க, தினமும் இரு வேளை பல் துலக்குவது மிகவும் அவசியம். மேலும், பல் இடுக்குகளை சுத்தம் (floss) செய்வதும் துர்நாற்றத்தைக் கட்டுப்படுத்த உதவும்.
