96 ஆண்டுகளுக்குப் பிறகு, ஸ்பானிஷ் மொழி பேசும் இரு பெரும் நாடுகள் உலகக் கோப்பை கால்பந்து இறுதிப்போட்டியில் இன்று பலப்பரீட்சை நடத்த உள்ளன. 1930-ம் ஆண்டு முதல் உலகக்கோப்பை இறுதிப்போட்டியில் உருகுவே மற்றும் அர்ஜென்டினா அணிகள் மோதிய பிறகு, இதுவே முதல் முறையாகும்.
23வது உலகக்கோப்பை கால்பந்து தொடரின் இறுதிப்போட்டி நாளை நடைபெற உள்ள நிலையில், அர்ஜென்டினா மற்றும் ஸ்பெயின் அணிகளில் யார் சாம்பியன் பட்டத்தை வெல்வார்கள் என்ற எதிர்பார்ப்பு ரசிகர்களிடையே எழுந்துள்ளது. நடப்பு ஃபிஃபா உலகக் கோப்பை சாம்பியனான அர்ஜென்டினா மற்றும் யூரோ 2024 சாம்பியனான ஸ்பெயின் அணிகள், உலகக் கோப்பை மகுடத்தை கைப்பற்றுவதற்காக அமெரிக்காவின் நியூயார்க்/நியூ ஜெர்சி மைதானத்தில் இன்று மோதுகின்றன. இந்திய நேரப்படி ஜூலை 20 அதிகாலை 12.30 மணிக்கு தொடங்கும் இந்த ஆட்டம், உலகம் முழுவதும் உள்ள கால்பந்து ரசிகர்களின் கவனத்தை ஈர்த்துள்ளது.
2010-ஆம் ஆண்டுக்குப் பிறகு மீண்டும் உலகக் கோப்பையை வெல்லும் இலக்குடன் ஸ்பெயின் களமிறங்குகிறது. மறுபுறம், நடப்பு சாம்பியனான அர்ஜென்டினா தொடர்ந்து இரண்டாவது முறையாக பட்டத்தை வென்று தனது ஆதிக்கத்தை நிலைநாட்டும் முனைப்பில் உள்ளது.
அரையிறுதியில் இங்கிலாந்துக்கு எதிராக ஆரம்பத்தில் பின்தங்கியிருந்த அர்ஜென்டினா, பின்னர் சிறப்பாக மீண்டு வந்து 2-1 என்ற கோல் கணக்கில் வெற்றி பெற்றது. என்சோ பெர்னாண்டஸ் சமநிலை கோலை அடித்தார். கூடுதல் நேரத்தின் இறுதி நிமிடங்களில் லவுடாரோ மார்ட்டினஸ் அடித்த வெற்றி கோல், அணியை இறுதிப்போட்டிக்கு அழைத்துச் சென்றது. இதன் மூலம் 1966-க்கு பிறகு முதல் முறையாக உலகக் கோப்பை இறுதிப்போட்டியை அடைய வேண்டும் என்ற இங்கிலாந்தின் கனவு முடிவுக்கு வந்தது.
மற்றொரு அரையிறுதியில், ஸ்பெயின் அணி பிரான்ஸை 2-0 என்ற கோல் கணக்கில் வீழ்த்தி இறுதிப்போட்டிக்கு முன்னேறியது. லமின் யமால் பெற்றுத் தந்த பெனால்டியை மிகேல் ஒயர்சாபல் கோலாக மாற்றி அணிக்கு முன்னிலை ஏற்படுத்தினார். பின்னர் டானி ஒல்மோ உருவாக்கிய தாக்குதலை பெட்ரோ பொரோ கோலாக மாற்றி வெற்றியை உறுதி செய்தார். பிரான்ஸ் இறுதிவரை போராடிய போதிலும், ஸ்பெயினின் வலுவான தற்காப்பு ஆட்டம் அவர்களை கோல் அடிக்க விடாமல் தடுத்தது. இந்தத் தொடரில் ஏழு போட்டிகளில் ஆறாவது முறையாக 'க்ளீன் ஷீட்' பதிவு செய்த ஸ்பெயின், தனது இரண்டாவது உலகக் கோப்பை இறுதிப்போட்டியை எட்டியுள்ளது.
ஸ்பெயின் பயிற்சியாளர் லூயிஸ் டி லா ஃபுவென்டே கூறுகையில், 'இரு அணிகளும் திறமை, தரம் மற்றும் தாக்குதல் பாணியில் ஒத்த அணிகள். ரசிகர்களுக்கு விறுவிறுப்பான கால்பந்தை வழங்கும் சிறந்த போட்டியாக இது அமையும்' என்று நம்பிக்கை தெரிவித்துள்ளார்.
அர்ஜென்டினா பயிற்சியாளர் லயனல் ஸ்கலோனி கூறுகையில், 'இந்த இறுதிப்போட்டியில் வெற்றி பெற வேண்டுமெனில் எங்களது சிறந்த ஆட்டத்தை வெளிப்படுத்த வேண்டும். ஒவ்வொரு போட்டியையும் அணுகுவது போலவே முழுமையான திட்டத்துடன் தயாராகியுள்ளோம். எதிரணியின் பலம், பலவீனங்களை ஆராய்ந்துள்ளோம். எங்களின் சிறந்த ஆட்டத்தை வெளிப்படுத்தி மீண்டும் உலக சாம்பியன் பட்டத்தை தக்கவைக்க போராடுவோம்' என்று கூறியுள்ளார்.
ஒருபுறம் நடப்பு உலக சாம்பியனான அர்ஜென்டினா, மறுபுறம் ஐரோப்பிய சாம்பியனான ஸ்பெயின். இரு வலுவான அணிகள் நேருக்கு நேர் மோதுவதால், இந்த இறுதிப்போட்டி உலக கால்பந்து ரசிகர்களுக்கு மறக்க முடியாத விருந்தாக அமையும் என்ற எதிர்பார்ப்பு நிலவுகிறது.
