சட்டப்பேரவை மாண்பைக் காக்க வேண்டும் என்றும், எதிர்க்கட்சி உறுப்பினர் முதல்வர் ஒருவரை மிரட்டும் தொனியில் பேசியது அவை உரிமை குழுவுக்கு அனுப்பப்பட வேண்டும் என்றும் முன்னாள் சபாநாயகர் அப்பாவு வலியுறுத்தியுள்ளார். இது தொடர்பாக அவர் தனது எக்ஸ் தளத்தில் பதிவிட்டுள்ளதாவது:
2021-ல் திமுக ஆட்சிக்கு வந்ததும், அப்போதைய முதல்வர் மு.க.ஸ்டாலின் அவர்களின் ஆலோசனையின்படி, சட்டமன்ற நடவடிக்கைகள் முதன்முதலில் பேரவை விதிகளுக்கு உட்பட்டு நேரலையாக ஒளிபரப்பப்பட்டன. மேலும், அனைத்து சட்டமன்ற உறுப்பினர்களுக்கும் கையடக்கக் கணினி வழங்கி, காகிதமில்லா சட்டமன்றத்தை உருவாக்கியதும் திமுக ஆட்சியில்தான். 1921 முதல் 2021 வரையிலான சட்டமன்ற பதிவுகள் அனைத்தும் ஆன்லைனில் பதிவேற்றம் செய்யப்பட்டு, உலகின் எந்த மூலையில் இருந்தும் தெரிந்துகொள்ளும் ஏற்பாட்டைச் செய்ததும் மு.க.ஸ்டாலின் அவர்கள்தான்.
சட்டமன்ற நடவடிக்கைகளை நேரலையாக ஒளிபரப்பும்போது, உறுப்பினர்கள் தவறுதலாகப் பேசி மக்களிடையே அமைதியின்மை ஏற்படாத வகையில், ஒளிபரப்பை 10 நிமிடங்கள் தாமதப்படுத்தலாம் என்றும், இது குறித்து அனைத்து உறுப்பினர்களுக்கும் பயிற்சி அளிக்க வேண்டும் என்றும் திமுக ஆட்சியின்போது முடிவு செய்யப்பட்டது. அமைச்சர்கள் சட்டமன்றத்தில் மரபு மீறிப் பேசும் வார்த்தைகள் அவைக்குறிப்பில் இருந்து நீக்கப்பட்ட பிறகும், ஆளும் கட்சி நிர்வாகிகள் ரீல்ஸ் உருவாக்கி சமூக வலைத்தளங்களில் வெளியிடுவதைத் தடுக்கவே இந்த 10 நிமிட தாமத ஒளிபரப்பு முடிவு எடுக்கப்பட்டது.
பேரவைக்கு வெளியே எதிர்க்கட்சி உறுப்பினர் ஒருவர் முதல்வரை மிரட்டும் தொனியில் பேசியது அவை சம்பந்தப்பட்ட விஷயம். இதை அவை உரிமை குழுவுக்கு அனுப்ப முடிவு செய்தால், எதிர்க்கட்சி உறுப்பினர்களை பேரவைக்குள் வைத்துப் பூட்டுவேன் என்றும், 'கொத்து புரோட்டா போட்டுவிட்டேன்' என்றும், 'Dash Dash' என்றும் முதல்வர் பேரவைக்கு வெளியே மிரட்டியதும் அவை உரிமை குழுவுக்கு அனுப்புவதுதான் சட்டமன்ற மாண்பு. இது குறித்து அவர் மேலும் கூறுகையில், '6 அதிமுக சட்டமன்ற உறுப்பினர்கள் ராஜினாமா செய்தது நீதிமன்றத்தில் இருக்கும்போது, திமுக சட்டமன்ற உறுப்பினர் பேசிய விஷயமும் நீதிமன்றத்தில் இருக்கிறது. இரண்டையும் ஒரே நிலையில் பார்க்காமல், ஒன்றை ஏற்று மற்றொன்றை நிராகரிப்பது பேரவை மாண்பல்ல' என்று குறிப்பிட்டுள்ளார்.
எதிர்க்கட்சியினர் முன்வைக்கும் பொதுநலம் சார்ந்த கேள்விகளுக்கு அமைச்சர்கள் நேரடியாகப் பதிலளிக்க முடியாமல், தகாத வார்த்தைகளைப் பயன்படுத்தி எதிர்க்கட்சி உறுப்பினர்களை வம்புக்கு இழுக்கும்போது, அவர்கள் பயன்படுத்தும் வார்த்தைகள் மட்டும் பூதாகரமாக்கப்படுவதைத் தவிர்க்க வேண்டும் என்றும் அவர் வலியுறுத்தியுள்ளார். சட்டமன்ற மாண்பு காக்கப்பட வேண்டும் என்பதே அனைவரின் எதிர்பார்ப்பாகும்.
