சேலம், நாமக்கல் மற்றும் தருமபுரி மாவட்டங்களில் உள்ள கல்லூரி மாணவர்களை குறிவைத்து, அவர்களின் ஆதார் விவரங்களைப் பயன்படுத்தி, கறவை மாடு வாங்குவதற்காக வங்கிகளில் கோடிக்கணக்கில் கடன் பெற்று பெரிய அளவில் மோசடி நடந்துள்ளது.
இந்த திட்டமிட்ட முறைகேடு, சேலம் சின்னதிருப்பதி பகுதியைச் சேர்ந்த கண்ணகி என்பவர் நடத்தி வரும் ‘பெஸ்ட் எம்பவர்மென்ட்’ என்ற அறக்கட்டளை மூலம் அரங்கேறியுள்ளது. மாணவர்களின் வங்கிக் கணக்குகளுக்கு வரும் பணத்தை தங்களுக்கு மாற்றிக் கொடுத்தால் கமிஷன் தருவதாக ஆசை வார்த்தை கூறி இந்த மோசடியில் ஈடுபட்டுள்ளனர்.
சில மாதங்களுக்கு முன்பு, இந்த அறக்கட்டளை நிர்வாகிகள் மாணவர்களை அணுகி, அவர்களின் வங்கிக் கணக்குகளுக்கு வரும் பணத்தை தங்களின் கணக்கிற்கு மாற்றினால் ரூ.1,000 கமிஷன் தருவதாகக் கூறி ஆதார் அட்டைகளைப் பெற்றுள்ளனர். இதை நம்பிய மாணவர்கள், கமிஷன் தொகையைப் பெற்று வந்துள்ளனர்.
ஆனால், சில நாட்களுக்குப் பிறகு தனியார் வங்கிகளில் இருந்து மாணவர்களுக்கு கடன் தவணை செலுத்தக்கோரி நோட்டீஸ்கள் வந்தன. இதைக் கண்டு அதிர்ச்சி அடைந்த மாணவர்கள், இதுகுறித்து சேலம் மாநகர போலீஸ் கமிஷனர் அலுவலகத்தில் புகார் மனு அளித்தனர்.
இந்த புகாரின் அடிப்படையில், மாநகர மத்திய குற்றப்பிரிவு போலீசார் தீவிர விசாரணை நடத்தி, இந்த முறைகேட்டை உறுதி செய்தனர். இந்த மோசடி தொடர்பாக, சேலம் மாவட்டத்தைச் சேர்ந்த அறக்கட்டளை நிர்வாகி கண்ணகி மற்றும் அவரது கூட்டாளி முத்துகுமரன் ஆகியோரை போலீசார் கைது செய்துள்ளனர்.
இந்த கடன் மோசடி வழக்கில் தொடர்புடைய, தலைமறைவாக உள்ள மேலும் சிலரைத் தனிப்படை போலீசார் தீவிரமாகத் தேடி வருகின்றனர். மாணவர்களின் எதிர்காலத்தைக் குறிவைத்து நடைபெற்ற இந்த மாபெரும் கடன் மோசடி குறித்து காவல்துறையினர் விரிவான விசாரணையைத் தொடர்ந்து மேற்கொண்டு வருகின்றனர்.
