குழந்தைகளுக்கான பால் பவுடர்களில் விதிமுறைகளை மீறி விளம்பரம் செய்ததாகவும், ஊட்டச்சத்து அளவு குறைவாக இருந்ததாகவும் புகார்கள் எழுந்ததையடுத்து, புகழ்பெற்ற நெஸ்லே இந்தியா நிறுவனத்தின் மீது இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) சட்ட நடவடிக்கை எடுத்துள்ளது. இது தொடர்பாக மூன்று தனித்தனி வழக்குகள் பதிவு செய்யப்பட்டுள்ளன.
நெஸ்லே நிறுவனத்தின் 'நான் எக்செல்லா புரோ ஸ்டேஜ் 1', 'லாக்டோஜென் புரோ 1' மற்றும் 'பாலோ அப் பார்முலா' ஆகிய மூன்று வகையான பால் பவுடர்களை FSSAI ஆய்வு செய்தது. இந்த ஆய்வின்போது, பொருட்களின் விளம்பரங்களும் தீவிரமாக பரிசீலிக்கப்பட்டன.
குறிப்பாக, 'நான் எக்செல்லா புரோ ஸ்டேஜ் 1' பால் பவுடரின் விளம்பரத்தில், '5 எச்.எம்.ஓ.,க்கள்' மற்றும் 'வெய் புரோட்டீன்' பற்றிய தகவல்கள் இடம்பெற்றிருந்தன. இதில், '5 எச்.எம்.ஓ.,க்கள்' என்பது தாய்ப்பாலில் உள்ள சர்க்கரை சேர்க்கை குறித்தும், 'வெய் புரோட்டீன்' என்பது பாலில் உள்ள ஒரு வகை புரதம் குறித்தும் தெரிவிக்கப்பட்டது. இந்த விளம்பரத் தகவல்கள், குழந்தைகளுக்கான உணவு விதிமுறைகளுக்கு முரணாக இருப்பதாக FSSAI கண்டறிந்துள்ளது. இது தொடர்பாக நெஸ்லே இந்தியாவிடம் விளக்கம் கோரப்பட்டது.
அதேபோல், 'லாக்டோஜென் புரோ 1' பால் பவுடரின் விளம்பரத்தில், 'வெய் புரோட்டீன்' எளிதில் செரிமானமாகும் என்று குறிப்பிடப்பட்டிருந்தது. இதற்கும் நெஸ்லே நிறுவனத்திடம் FSSAI விளக்கம் கேட்டது. இந்த இரண்டு விளம்பரங்கள் தொடர்பான தகவல்கள், விதிமுறைகளுக்கு புறம்பானவை என ஆணையம் தெரிவித்துள்ளது.
மேலும், இணை உணவு சாப்பிடத் தொடங்கும் குழந்தைகளுக்காக தயாரிக்கப்பட்ட நெஸ்லேவின் 'பாலோ அப் பார்முலா' பவுடர் ஒன்றும் ஆய்வக பரிசோதனைக்கு உட்படுத்தப்பட்டது. இந்த சோதனையில், 'வைட்டமின் பி7' எனப்படும் பயோட்டின் சத்து, நிர்ணயிக்கப்பட்ட அளவுக்கு குறைவாக இருந்தது கண்டறியப்பட்டது. இந்த முடிவை மறுசோதனையிலும் உறுதி செய்தது FSSAI.
இந்த மூன்று வெவ்வேறு குற்றச்சாட்டுகளின் அடிப்படையில், நெஸ்லே இந்தியா நிறுவனத்திற்கு எதிராக தனித்தனியாக மூன்று வழக்குகள் பதிவு செய்யப்பட்டுள்ளதாக FSSAI அறிவித்துள்ளது. இதில், இரண்டு வழக்குகள் தவறான விளம்பரத் தகவல்கள் தொடர்பாகவும், மற்றொரு வழக்கு பயோட்டின் அளவு குறைபாடு தொடர்பாகவும் பதிவு செய்யப்பட்டுள்ளன.
இதற்கு பதிலளித்துள்ள நெஸ்லே நிறுவனம், 'நான் எக்செல்லா புரோ' மற்றும் 'லாக்டோஜென் புரோ' ஆகிய குழந்தைகள் உணவுப் பொருட்களும், அவற்றின் லேபிள்களும் FSSAI-யின் நிபுணர் குழுவால் ஏற்கனவே அங்கீகரிக்கப்பட்டவை என்றும், அவை அனைத்து விதிமுறைகளுக்கும் உட்பட்டவை என்றும் தெரிவித்துள்ளது. லேபிள்களில் உள்ள தகவல்கள் அறிவியல் ஆய்வுகளின் அடிப்படையில் உண்மையானவை என்றும், இது குறித்து அதிகாரிகளிடம் விரிவான விளக்கம் அளித்துள்ளதாகவும் நெஸ்லே நிறுவனம் கூறியுள்ளது. அனைத்து சட்டங்கள் மற்றும் விதிமுறைகளை தொடர்ந்து கடைப்பிடிப்போம் என்றும், நுகர்வோர் விழிப்புணர்வு நடவடிக்கைகளுக்கு ஒத்துழைப்போம் என்றும் நெஸ்லே நிறுவனம் தெரிவித்துள்ளது.
