சென்னையில் உள்ள தலைமைச் செயலகத்தில், முதலமைச்சர் விஜய் தலைமையில் நடைபெற்ற ஆய்வுக் கூட்டத்தில், தமிழ்நாட்டில் உள்ள அனைத்து அரசு மற்றும் அரசு உதவிபெறும் பள்ளிகளில் ஆறாம் வகுப்பு முதல் எட்டாம் வகுப்பு வரை பயிலும் மாணவ, மாணவியருக்கு பெருந்தலைவர் காமராஜர் காலை உணவுத் திட்ட விரிவாக்கம் மற்றும் செயல்படுத்துதல் குறித்து விரிவாக விவாதிக்கப்பட்டது.
இந்த முக்கிய ஆய்வுக் கூட்டத்தில், ஊரக வளர்ச்சி மற்றும் நீர்வளத்துறை அமைச்சர் ஆனந்த், பள்ளிக்கல்வி, தமிழ் வளர்ச்சி, செய்தி மற்றும் விளம்பரத்துறை அமைச்சர் ராஜ்மோகன், சமூக நலன் மற்றும் மகளிர் உரிமைத்துறை அமைச்சர் ஜெகதீஸ்வரி, தலைமைச் செயலாளர் முனைவர்.சாய்குமார், நகராட்சி நிருவாகம் மற்றும் குடிநீர் வழங்கல் துறை கூடுதல் தலைமைச் செயலாளர் ககன்தீப் சிங் பேடி, ஊரக வளர்ச்சி மற்றும் ஊராட்சித் துறை முதன்மைச் செயலாளர் தர்மேந்திர பிரதாப் யாதவ், சமூக நலன் மற்றும் மகளிர் உரிமைத் துறைச் செயலாளர் பல்லவி பல்தேவ், பள்ளிக்கல்வித்துறைச் செயலாளர் இன்னசென்ட் திவ்யா உள்ளிட்ட அரசு உயர் அதிகாரிகள் பலரும் கலந்துகொண்டனர்.
மாணவர்களின் உடல் நலம், ஊட்டச்சத்து, பள்ளி வருகை மற்றும் கற்றல் திறனை மேம்படுத்தும் நோக்கில், பள்ளிக் கல்வியின் அடித்தளத்தை வலுப்படுத்தும் வகையில் காமராஜர் காலை உணவுத் திட்டம் விரிவாக்கம் செய்யப்படுவதாக தமிழ்நாடு அரசு வெளியிட்டுள்ள செய்திக்குறிப்பில் தெரிவிக்கப்பட்டுள்ளது. இந்த விரிவாக்கப் பணியை தமிழ்நாடு முதலமைச்சர் வரும் செப்டம்பர் 22-ஆம் தேதி அன்று சென்னையில் தொடங்கி வைக்க உள்ளார்.
தற்போது தொடக்கப் பள்ளி மாணவர்களுக்கு மட்டும் வழங்கப்படும் இந்தத் திட்டம், இனி நடுநிலைப் பள்ளி மாணவர்களையும் உள்ளடக்கும் வகையில் விரிவுபடுத்தப்படுகிறது. இதன் மூலம் பெருந்தலைவர் காமராஜர் காலை உணவுத் திட்டம், மாணவர்களின் கல்விப் பயணத்திற்கும், சமூக முன்னேற்றத்திற்கும் பெரும் துணையாக அமையும் என்று எதிர்பார்க்கப்படுகிறது.
ஆய்வுக் கூட்டத்தின் போது, முதலமைச்சர், காமராஜர் காலை உணவுத் திட்டத்தைச் செயல்படுத்தும் சமையல் கூடங்கள் மற்றும் உணவு பரிமாறும் இடங்கள் மிகவும் சுத்தமாகவும், சுகாதாரமாகவும் பராமரிக்கப்பட வேண்டும் என்றும், அவை தொடர்ச்சியாக கண்காணிக்கப்பட வேண்டும் என்றும் உத்தரவிட்டார். மேலும், மாணவர்களுக்கு சூடான, சுவையான, சரியான அளவில், ஊட்டச்சத்து மிகுந்த உணவு வழங்கப்பட வேண்டும் என்றும், இத்திட்டத்திற்காகப் பணியாற்றும் அனைத்துத் துறை அலுவலர்களும் தங்களுக்கு ஒதுக்கப்பட்ட பணிகளை ஒருங்கிணைந்து சிறப்பாகச் செய்ய வேண்டும் என்றும் அறிவுறுத்தினார்.
இந்தத் திட்ட விரிவாக்கத்தின் மூலம், 15,454 அரசு மற்றும் அரசு உதவிபெறும் பள்ளிகளில் பயிலும் சுமார் 15.30 லட்சம் மாணவ, மாணவிகள் கூடுதலாகப் பயனடைவார்கள். இதற்காக நடப்பு நிதியாண்டில் கூடுதலாக 217 கோடியே 63 லட்சம் ரூபாய் நிதி ஒதுக்கப்பட்டுள்ளது. இத்திட்டத்திற்காக ஒட்டுமொத்தமாக 724 கோடி ரூபாய் நிதி ஒதுக்கீடு செய்யப்பட்டுள்ளது.
ஆலோசனைக் கூட்டத்திற்குப் பிறகு செய்தியாளர்களைச் சந்தித்த பள்ளிக்கல்வித்துறை அமைச்சர் ராஜ்மோகன், வரும் செப்டம்பர் 22-ஆம் தேதி அன்று காமராஜர் காலை உணவுத் திட்டம் விரிவாக்கம் செய்யப்பட உள்ளதாகத் தெரிவித்தார். இதன் மூலம் மொத்தம் 34,64,371 மாணவர்களுக்கு தினந்தோறும் காலை உணவு கிடைக்கும் என்றும், இத்திட்டம் தமிழ்நாடு முழுவதும் உள்ள 38 மாவட்டங்களில் ஒரே நேரத்தில் விரிவாக்கம் செய்யப்பட்டுள்ளதாகவும் அவர் கூறினார்.
காலை உணவுகளைத் தடையின்றி தரமாக வழங்குவதற்காக, உணவு தயாரிப்பது, கொண்டு செல்வது, சமைப்பதற்குத் தேவையான உபகரணங்கள் மற்றும் அத்தியாவசியப் பொருட்கள் போன்ற தேவைகள் அடையாளம் காணப்பட்டு, அவை பூர்த்தி செய்யப்பட்டு வருவதாகவும் அமைச்சர் தெரிவித்தார். மேலும், ஒவ்வொரு நாளும் பொங்கல், கிச்சடி போன்ற பல வகை உணவுகளைத் தயாரித்து வழங்கத் திட்டமிடப்பட்டுள்ளதாகவும், புதிய உணவு வகைகளைக் கொண்டு வருவதற்காக சமையல் நிபுணர்களைக் கொண்ட சிறப்புக் குழு அமைக்க முதலமைச்சர் உத்தரவிட்டுள்ளதாகவும் அவர் குறிப்பிட்டார்.
பள்ளிக் குழந்தைகளுக்கும் சிக்கன் பிரியாணி வழங்க வேண்டும் என்ற முதலமைச்சரின் எண்ணம் இருப்பதாகவும், ஆனால் அது உடனடியாக சாத்தியமில்லை என்றும், எதிர்காலத்தில் பரிசோதனை முறையில் செயல்படுத்திய பிறகு, காலை உணவில் சிக்கன் பிரியாணி வழங்க ஏற்பாடு செய்யப்படும் என்றும் அமைச்சர் ராஜ்மோகன் தெரிவித்தார். தலைமை ஆசிரியர்கள், ஆசிரியர்கள் மீது எந்தவிதமான பொருளாதாரச் சுமையையும் சுமத்தக்கூடாது என்றும், செப்டம்பர் 22-ஆம் தேதிக்குள் தேவையான உபகரணங்கள் அனைத்துப் பள்ளிகளுக்கும் சென்றடைந்துவிடும் என்றும் அவர் உறுதியளித்தார்.
