ஸ்ரீகாகுளம்: ஆந்திர மாநில முதலமைச்சர் சந்திரபாபு நாயுடு, மக்கள் தொகைப் பெருக்கத்தைக் கட்டுப்படுத்தாமல், குழந்தைகளின் எண்ணிக்கையை அதிகரிக்கும் குடும்பங்களுக்கு நிதியுதவி அறிவித்து அதிரடி காட்டியுள்ளார். 'நம் பிள்ளைகளே நமது சொத்து' என்ற கருத்தை வலியுறுத்தி, 3-வது குழந்தையைப் பெற்றுக் கொள்ளும் தாய்மார்களுக்கு ரூ.30,000-ம், 4-வது குழந்தை பெற்றுக் கொள்ளும் தாய்மார்களுக்கு ரூ.40,000-ம் அரசு சார்பில் வழங்கப்படும் என அவர் அறிவித்துள்ளார். இந்த அறிவிப்பு மக்கள் மத்தியில் பெரும் வரவேற்பைப் பெற்றுள்ளது.
சந்திரபாபு நாயுடு ஸ்ரீகாகுளம் மாவட்டத்தில் 'தூய்மை ஆந்திரா – தங்க ஆந்திரா' திட்டத்தில் பங்கேற்றபோது இந்த அறிவிப்பை வெளியிட்டார். அவர் பேசுகையில், 'ஏழ்மையற்ற சமூகத்தை உருவாக்க வேண்டும் என்பதே எனது கனவு. அதற்கு பொருளாதார வளர்ச்சி அவசியம். தொழில் நிறுவனங்கள் இங்கு முதலீடு செய்ய வர வேண்டும். அப்போதுதான் மாநில வளர்ச்சி பல மடங்கு உயரும். தற்போது கூகுள் உட்பட பல நிறுவனங்கள் ஆந்திராவில் தொழில் தொடங்க முன்வந்துள்ளன. தெலுங்கு தேசம் தலைமையிலான கூட்டணி ஆட்சியில், கடந்த 23 மாதங்களில் மட்டும் ரூ.23 லட்சம் கோடி முதலீடுகள் வந்துள்ளன. இதன் மூலம் 24 லட்சம் பேருக்கு வேலைவாய்ப்பு கிடைக்கும். நமது அடுத்த தலைமுறை வளமான வாழ்க்கையை வாழ்வார்கள். இனி வட ஆந்திராவில் இருந்து பிழைப்பு தேடி வெளி மாநிலங்களுக்கு செல்ல வேண்டியதில்லை' என்று அவர் தெரிவித்தார்.
முன்னோர்கள் 'பிள்ளைகள் தான் நமது சொத்து' என்று கூறியதை நினைவு கூர்ந்த சந்திரபாபு நாயுடு, 'நாம் ஒன்று அல்லது இரண்டு பிள்ளைகளுடன் நிறுத்திவிட்டோம். ஆனால், பிள்ளைகள்தான் நமது சொத்து. அதனால், பிள்ளைகளை வளர்க்க பயப்பட வேண்டாம்' என்று மக்களுக்கு தைரியமூட்டினார். 3-வது குழந்தைக்கு ரூ.30,000, 4-வது குழந்தைக்கு ரூ.40,000 வழங்கப்படும் என்றும், ஏற்கனவே 'தாய்க்கு வந்தனம்' திட்டத்தின் கீழ் பிள்ளைகளை பள்ளிக்கு அனுப்பும் தாய்மார்களுக்கு ஆண்டுக்கு ரூ.15,000 வழங்கப்பட்டு வருவதாகவும், இந்த தொகையை மேலும் அதிகரிக்க யோசனை இருப்பதாகவும் அவர் கூறினார்.
முதலமைச்சர் சந்திரபாபு நாயுடுவின் இந்த அறிவிப்பு, மக்கள் தொகைப் பெருக்கம் குறித்த விவாதங்களை ஒருபுறம் எழுப்பினாலும், மறுபுறம் குடும்பக் கட்டுப்பாட்டை ஊக்குவிக்கும் ஒரு புதிய முயற்சியாகவும் பார்க்கப்படுகிறது. பொருளாதார வளர்ச்சியுடன் மக்கள் தொகைப் பெருக்கத்தையும் சமநிலைப்படுத்தும் வகையில் இந்தத் திட்டம் செயல்படுத்தப்படும் என எதிர்பார்க்கப்படுகிறது.
