செங்கோட்டையன் பேச்சு மதிமுகவினரைப் புண்படுத்திவிட்டது – துரை வைகோ

அமைச்சர் செங்கோட்டையன் மதிமுகவைப் பற்றி பேசியது வருத்தமளிப்பதாகவும், அது மதிமுகவினரைப் புண்படுத்திவிட்டதாகவும் மதிமுக முதன்மை செயலாளர் துரை வைகோ அதிருப்தி தெரிவித்துள்ளார். செங்கோட்டையனை தமிழ்நாட்டின் மூத்த அரசியல் தலைவர்களில் ஒருவராகக் கருதுவதாகவும், அவர் அப்படி பேசியிருக்கக் கூடாது என்றும் துரை வைகோ குறிப்பிட்டுள்ளார்.

இது தொடர்பாக அவர் மேலும் கூறுகையில், 'செங்கோட்டையன் நாக்கு தவறி பேசியிருக்கலாம். அவர் வேண்டும் என்றே அப்படி பேசியிருக்க வாய்ப்பில்லை. வரும் காலங்களில் இது போன்ற பேச்சுகளைத் தவிர்த்துக்கொள்ள வேண்டும். தமிழ்நாட்டின் மூத்த அரசியல்வாதியும் அமைச்சருமான செங்கோட்டையன், மதிமுகவை சிறுமைப்படுத்தும் வகையில் பேசியது வாய் தவறிதான் இருக்கும் என நம்புகிறேன்' என்று தெரிவித்தார்.

மதவாதத்திற்கும் ஊழல்வாதத்திற்கும் எதிராகவே இந்தியா கூட்டணி அமைக்கப்பட்டுள்ளது. தமிழ்நாட்டில் இந்த இரண்டிற்கும் எதிராக உள்ள முதலமைச்சர் விஜய், இந்தியா கூட்டணிக்கு வருவதுதான் தமிழ்நாட்டிற்கு நல்லது என்றும் துரை வைகோ வலியுறுத்தினார். முதலமைச்சர் விஜய்யை வருங்காலப் பிரதமர் என அக்கட்சியினர் பேசுவதில் எந்தத் தவறும் இல்லை என்றும், ஆர்வம் மிகுதியால் அவர்கள் அவ்வாறு பேசுவதாகவும் அவர் குறிப்பிட்டார்.

கடந்த 15 ஆண்டுகளாக தமிழ்நாட்டை ஆட்சி செய்தவர்கள் புதிய விமான நிலையம் அமைப்பதற்கு எந்தவித முயற்சிகளையும் மேற்கொள்ளவில்லை. பரந்தூர் பகுதியில் கடந்த திமுக ஆட்சியில் தேர்வு செய்யப்பட்ட இடத்திற்கு விவசாயிகள் எதிர்ப்பு தெரிவித்ததால், அதனை முதலமைச்சர் விஜய் கைவிட்டுள்ளார். இருப்பினும், சென்னையில் ஒரு பெரிய விமான நிலையம் அமைப்பது காலத்தின் தேவையாக உள்ளது என்றும், அதை முதலமைச்சர் விஜய் செய்ய வேண்டும் என்றும் துரை வைகோ கேட்டுக்கொண்டார்.

த.வெ.க. தமிழ்நாட்டில் மிகப்பெரிய மாற்றத்தை உருவாக்கி ஆட்சியில் அமர்ந்துள்ளது. த.வெ.க. ஆட்சியைக் கவிழ்க்க திமுக பல்வேறு முயற்சிகளை மேற்கொண்டு வருவதாகவும், டெல்லியிலும் அவர்கள் டீல் போட்டுள்ளதாகவும் துரை வைகோ குற்றம் சாட்டினார். இந்தச் சூழலில், த.வெ.க. மற்றும் கூட்டணிக் கட்சியினர் ஒற்றுமையாக இருக்க வேண்டும் என்றும், த.வெ.க.வினருக்கு கூட்டணிக் கட்சியினர் அரசியல் கற்றுக்கொடுக்க வேண்டும் என்றும் அவர் கேட்டுக்கொண்டார். சட்டமன்றத்தில் திமுகவினர் கண்ணாடிக் கூண்டிற்குள் இருந்து கல்லெறிவது போல் செயல்பட்டு வருகின்றனர் என்றும் அவர் விமர்சித்தார்.

Author

Fernandez

Senior Reporter

Fernandaz – MDTV 24x7 News நிறுவனத்தின் Senior Reporter மற்றும் General News Writer ஆக பணியாற்றி வருகிறார். அரசியல், சமூக நிகழ்வுகள், மக்கள் பிரச்சினைகள் மற்றும் முக்கிய நடப்பு செய்திகளை துல்லியமாகவும் விரைவாகவும் மக்களிடம் கொண்டு சேர்ப்பதில் அனுபவம் பெற்றவர். நம்பகமான தகவல்களை தரமான செய்திகளாக வழங்கும் நோக்கத்துடன் செய்தித்துறையில் தொடர்ந்து செயல்பட்டு வருகிறார்.