அமெரிக்க அதிபர் டொனால்டு ட்ரம்ப் சீனாவுக்கு அரசுமுறைப் பயணம் மேற்கொண்டுள்ள நிலையில், இரு நாடுகளுக்கும் இடையிலான உறவில் தைவான் விவகாரம் மிக முக்கியமானது என்றும், அதைச் சரியாகக் கையாளாவிட்டால் இரு நாடுகளுக்கும் இடையே மோதல்கள் ஏற்பட்டு உறவு ஆபத்தில் சிக்கும் என்றும் சீன அதிபர் ஜி ஜின்பிங் எச்சரித்துள்ளார். நேற்று சீனா சென்றடைந்த ட்ரம்ப்புக்கு உற்சாக வரவேற்பு அளிக்கப்பட்டது. பெய்ஜிங் விமான நிலையத்தில் சீன துணை அதிபர் ஹான் ஜெங் அவரை வரவேற்றார். இதைத் தொடர்ந்து, இன்று ஜி ஜின்பிங்கை ட்ரம்ப் சந்தித்துப் பேச்சுவார்த்தை நடத்தினார்.
இரு தலைவர்களுக்கும் இடையிலான இந்த முக்கிய சந்திப்பின் போது, தைவான் ஜலசந்தியில் அமைதியையும் ஸ்திரத்தன்மையையும் பாதுகாப்பது சீனாவுக்கும் அமெரிக்காவுக்கும் பொதுவான காரணியாக இருக்க வேண்டும் என்று ஜி ஜின்பிங் வலியுறுத்தினார். சீன-அமெரிக்க உறவுகளில் தைவான் பிரச்சினை ஒரு முக்கிய அங்கம் என்றும், அதைச் சரியாகக் கையாள்வது இரு தரப்பு உறவின் ஸ்திரத்தன்மைக்கு வழிவகுக்கும் என்றும் அவர் கூறினார். மாறாக, இதில் தவறு நடந்தால், இரு நாடுகளுக்கும் இடையே மோதல்கள் ஏற்பட்டு, ஒட்டுமொத்த உறவும் பெரும் ஆபத்தில் சிக்கக்கூடும் என்றும் ஜி ஜின்பிங் தனது கருத்தைத் தெரிவித்தார். மேலும், தைவான் சுதந்திரம் என்பது தைவான் ஜலசந்தியில் அமைதி நிலவுவதற்கு முரணானது என்பதையும் அவர் அழுத்தமாக சுட்டிக்காட்டினார்.
சீனா-அமெரிக்க பொருளாதார உறவுகள் பரஸ்பரம் நன்மை பயக்கும் என்றும், இரு நாடுகளுக்கும் வெற்றியைத் தேடித்தரும் என்றும் ஜி ஜின்பிங் தெரிவித்தார். நேற்று நடைபெற்ற இரு நாட்டு வர்த்தக குழுக்களின் கூட்டத்தில், சமநிலையான மற்றும் சாதகமான முடிவுகள் எட்டப்பட்டிருப்பது இரு நாட்டு மக்களுக்கும் உலகிற்கும் ஒரு நல்ல செய்தி என்று அவர் குறிப்பிட்டார். வர்த்தகப் போர்களில் யாருக்கும் வெற்றி கிடைக்காது என்பதை கடந்த கால சம்பவங்கள் மீண்டும் மீண்டும் நிரூபித்துள்ளன என்றும், கருத்து வேறுபாடுகள் இருக்கும் இடங்களில் சமமான ஆலோசனை மட்டுமே சரியான தேர்வாக இருக்கும் என்றும் அவர் கூறினார்.
நாம் கடினமாக உழைத்து உருவாக்கியுள்ள இந்த நல்லுறவையும், உத்வேகத்தையும் இரு தரப்பினரும் கூட்டாகப் பேணிப் பாதுகாக்க வேண்டும் என்று ஜி ஜின்பிங் கேட்டுக்கொண்டார். இந்தச் சந்திப்பு, இரு நாடுகளுக்கிடையேயான பதற்றமான சூழ்நிலையில் முக்கியத்துவம் வாய்ந்ததாகக் கருதப்படுகிறது. தைவான் விவகாரத்தில் சீனாவின் நிலைப்பாட்டை ஜி ஜின்பிங் தெளிவாக ட்ரம்ப்பிடம் எடுத்துரைத்திருப்பது, எதிர்கால உறவுகளுக்கு ஒரு வழிகாட்டுதலாக அமையும் என எதிர்பார்க்கப்படுகிறது.
