தடகள வீரர்களின் போராட்டத்தை சொல்லும் 'அங்கீகாரம்' படத்தின் டிரெய்லர் இன்று வெளியாகி ரசிகர்களின் கவனத்தை ஈர்த்துள்ளது. ஜூன் மாதம் இப்படம் திரையரங்குகளில் வெளியாகும் என அறிவிக்கப்பட்டுள்ளது.
ஸ்வஸ்திக் விஷன்ஸ் சார்பில் அறிமுக இயக்குனர் ஜே.பி. தென்பாதியான் இயக்கத்தில் 'அங்கீகாரம்' திரைப்படம் உருவாகியுள்ளது. இவர் பிரபல இயக்குனர் பா. ரஞ்சித்திடம் உதவி இயக்குனராக பணியாற்றிய அனுபவம் கொண்டவர். தடகள விளையாட்டு வீரர்களின் வாழ்க்கை சவால்கள், அவர்கள் எதிர்கொள்ளும் இன்னல்கள் ஆகியவற்றை உண்மை சம்பவங்களின் அடிப்படையில் இப்படம் படமாக்கப்பட்டுள்ளது.
'அறம்', 'அயலான்' போன்ற படங்களை தயாரித்த தயாரிப்பாளர் கே.ஜே.ஆர் இப்படத்தின் மூலம் கதாநாயகனாக அறிமுகமாகிறார். இவர்களுடன் சிந்தூரி விஸ்வநாத், விஜி வெங்கடேஷ், ரங்கராஜ் பாண்டே, மன்சூர் அலிகான், அஜித் கோஷி உள்ளிட்ட பலர் முக்கிய கதாபாத்திரங்களில் நடித்துள்ளனர். ஜிப்ரான் இப்படத்திற்கு இசையமைத்துள்ளார்.
சமீபத்தில் வெளியான படத்தின் ஃபர்ஸ்ட் லுக் போஸ்டர் நல்ல வரவேற்பை பெற்றிருந்த நிலையில், தற்போது வெளியாகியுள்ள டிரெய்லர் படத்தின் மீதான எதிர்பார்ப்பை மேலும் அதிகரித்துள்ளது. ஜூன் மாதம் இப்படம் திரையரங்குகளில் வெளியாகும் என படக்குழு அறிவித்துள்ளது.
