சூப்பர் ஸ்டார் ரஜினிகாந்த் மற்றும் உலகநாயகன் கமல்ஹாசன் இருவரும் இணைந்து நடிக்கவிருக்கும் பிரம்மாண்ட படத்தில் நடிகை த்ரிஷா ஒரு முக்கிய கதாபாத்திரத்தில் நடிக்கவுள்ளதாக தகவல்கள் பரவி வருகின்றன. நெல்சன் திலீப்குமார் இயக்கத்தில் உருவாகும் இந்த படத்திற்கான அறிவிப்பு ஏற்கனவே வெளியாகி, ப்ரோமோ வீடியோவும் வெளியானது குறிப்பிடத்தக்கது. ரெட் ஜெயன்ட் மூவிஸ் நிறுவனம் தயாரிக்கும் இப்படத்திற்கு ராஜீவ் மேனன் ஒளிப்பதிவு செய்ய, அனிருத் இசையமைக்கவுள்ளார்.
தற்போது வெளியாகியுள்ள தகவல்களின்படி, இந்த படத்தில் த்ரிஷா ஒரு முக்கிய வேடத்தில் நடிப்பது கிட்டத்தட்ட உறுதியாகிவிட்டது. ரஜினிகாந்த் மற்றும் கமல்ஹாசன் இருவருடனும் த்ரிஷா தனித்தனியாக கதாநாயகியாக நடித்துள்ளார். பல வருடங்களுக்குப் பிறகு ரஜினி மற்றும் கமல் இணைந்து நடிக்கும் இந்த படத்தில் த்ரிஷா ஒப்பந்தமாகியிருப்பது முக்கியத்துவம் வாய்ந்ததாக பார்க்கப்படுகிறது.
இப்படத்தின் படப்பிடிப்பு 'ஜெயிலர் 2' திரைப்படம் வெளியான பிறகு தொடங்கும் என படக்குழு தெரிவித்துள்ளது. இதற்கான முதற்கட்டப் பணிகள் தற்போது விறுவிறுப்பாக நடைபெற்று வருகின்றன. 'ஜெயிலர் 2' படத்தின் விளம்பரப் பணிகள் அனைத்தும் முடிந்ததும், த்ரிஷா ஒப்பந்தம் செய்யப்பட்டதற்கான அதிகாரப்பூர்வ அறிவிப்பு வெளியாகும் என்று எதிர்பார்க்கப்படுகிறது.
