மேற்கு வங்கத்தின் முர்ஷிதாபாத் மாவட்டத்தில் பெரும் சோகம் நிகழ்ந்துள்ளது. பெர்காம்பூர் பகுதியில் உள்ள ஒரு பள்ளியின் வாகனத்தின் மீது ரயில் மோதியதில் இரண்டு குழந்தைகள் பரிதாபமாக உயிரிழந்தனர்.
நேற்று காலை, பள்ளிக்கு மாணவர்களை ஏற்றிச் சென்றுகொண்டிருந்த கார் ஒன்று, திறந்திருந்த கர்னசுபர்னா ரயில்வே கிராசிங்கைக் கடக்க முயன்றபோது இந்த துயர சம்பவம் அரங்கேறியது. காலை சுமார் 7:00 மணியளவில், நிம்திதா – கட்வா பயணியர் ரயில் அதிவேகமாக வந்து கார் மீது பயங்கரமாக மோதியது. இந்த கோர விபத்தில் கார் முற்றிலும் நொறுங்கியது.
இந்த விபத்தில் காரில் இருந்த இரண்டு மாணவர்கள் உட்பட மூன்று பேர் சம்பவ இடத்திலேயே உயிரிழந்தனர். மேலும், பல மாணவர்கள் காயமடைந்தனர். விபத்து குறித்த தகவல் அறிந்ததும் உடனடியாக சம்பவ இடத்திற்கு வந்த காவல்துறையினர், காயமடைந்த மாணவர்களை மீட்டு முர்ஷிதாபாத் மருத்துவக் கல்லூரி மருத்துவமனையில் சிகிச்சைக்காக அனுமதித்தனர். அவர்களுக்கு அங்கு தீவிர சிகிச்சை அளிக்கப்பட்டு வருகிறது.
சம்பவத்தை நேரில் கண்டவர்கள் அளித்த தகவலின்படி, கர்னசுபர்னா ரயில்வே கிராசிங்கை பள்ளி கார் கடப்பதற்கு முன்னர் ஒரு ரயில் வந்து சென்றது. அதற்காக மூடப்பட்டிருந்த ரயில்வே கேட், அந்த ரயில் சென்றதும் திறக்கப்பட்டது. ஆனால், அதே நேரத்தில் மற்றொரு தண்டவாளத்தில் வந்த ரயில், பள்ளி வேன் மீது மோதியுள்ளது. கேட் கீப்பரின் அலட்சியமே இந்த பெரும் விபத்துக்குக் காரணம் என்று அவர்கள் தெரிவித்தனர்.
இந்த துயரச் சம்பவத்தைத் தொடர்ந்து, ரயில்வே நிர்வாகம் உடனடியாக கேட் கீப்பர் மற்றும் கண்காணிப்பாளரை பணியிடை நீக்கம் செய்து உத்தரவிட்டுள்ளது. இந்த விபத்து அப்பகுதியில் பெரும் சோகத்தையும், அதிர்ச்சியையும் ஏற்படுத்தியுள்ளது.
இந்த சம்பவம் குறித்து மேலும் விசாரணை நடைபெற்று வருகிறது. பள்ளி வாகனங்கள் ரயில்வே கிராசிங்குகளைக் கடக்கும்போது மிகுந்த கவனத்துடன் செயல்பட வேண்டும் என வலியுறுத்தப்பட்டுள்ளது. மாணவர்களின் பாதுகாப்பு உறுதி செய்யப்பட வேண்டியதன் அவசியத்தை இந்த விபத்து மீண்டும் ஒருமுறை உணர்த்தியுள்ளது.
