எம்எல்சி 2026 கிரிக்கெட் தொடரில், எம்ஐ நியூயார்க் அணியை 127 ரன்களுக்குள் சுருட்டிய டெக்சாஸ் சூப்பர் கிங்ஸ் (TSK) அணி, பின்னர் 19 ஓவர்களில் இலக்கை எட்டி வெற்றி பெற்றது. இந்த வெற்றியின் மூலம், ஐந்து போட்டிகளில் தனது மூன்றாவது வெற்றியைப் பதிவு செய்த TSK அணி, புள்ளிப் பட்டியலில் முதலிடத்திற்கு முன்னேறியுள்ளது. இது நடப்பு தொடரின் மிகக் குறைந்த ரன்கள் எடுக்கப்பட்ட போட்டியாக அமைந்தது.
டாஸ் வென்ற டெக்சாஸ் சூப்பர் கிங்ஸ் கேப்டன் ஃபாப் டு பிளெசிஸ் முதலில் பந்துவீச்சை தேர்வு செய்தார். ஆட்டத்தின் 7-வது ஓவர் முடிவடைவதற்குள் எம்ஐ நியூயார்க் அணியின் பாதி பேட்டர்கள் பெவிலியன் திரும்பினர். ஆடம் மில்னே ஆரம்பத்திலேயே விக்கெட்டுகளை வீழ்த்தி அதிர்ச்சி அளித்தார். அவர் மோனங்க் படேல் மற்றும் ரையான் ரிகெல்டன் ஆகியோரை அடுத்தடுத்து ஆட்டமிழக்கச் செய்தார். ஹர்தஸ் வில்ஜோன் பந்துவீச்சில் தஜிந்தர் சிங் அவுட்டானதைத் தொடர்ந்து, டொனாவன் பெரைரா பந்துவீச்சில் குயின்டன் டி காக் மற்றும் கீரன் பொல்லார்ட் ஆகியோரை வீழ்த்தினார். ஏழாவது ஓவரின் முதல் பந்திலேயே பொல்லார்ட் ஆட்டமிழக்க, எம்ஐ நியூயார்க் அணி 52 ரன்களுக்கு 5 விக்கெட்டுகளை இழந்து திணறியது. நிக்கோலஸ் பூரனும் சோபிக்கத் தவறி, 11 பந்துகளில் 3 ரன்கள் மட்டுமே எடுத்த நிலையில் பெரைராவின் பந்துவீச்சில் ஆட்டமிழந்தார்.
பின்வரிசை வீரர்களான கோர்பின் போஷ் (27 பந்துகளில் 24), சன்னி படேல் (24 பந்துகளில் 26 நாட் அவுட்) மற்றும் டிரெண்ட் போல்ட் (12 பந்துகளில் 18) ஆகியோரின் போராட்டத்தால் எம்ஐ நியூயார்க் அணி 127 ரன்களை எட்டியது. 128 ரன்கள் என்ற இலக்கு பெரியதாகத் தோன்றவில்லை என்றாலும், அதை எட்ட TSK அணி இறுதிவரை போராட வேண்டியிருந்தது. அணியில் அதிகபட்சமாக சாய் தேஜா முக்கமல்லா 37 பந்துகளில் 38 ரன்கள் எடுத்தார். ரிலீ ரோசோவ் 18 ரன்களும், கேப்டன் டு பிளெசிஸ் 9 பந்துகளில் 13 ரன்களும் எடுத்தனர்.
TSK அணியின் பேட்டர்கள் அனைவரும் நல்ல தொடக்கத்தைப் பெற்று கணிசமான பங்களிப்பை வழங்கியதால் விக்கெட் சரிவு ஏற்படவில்லை. இறுதியில் டொனாவன் பெரைரா 13 பந்துகளில் 18 ரன்களுடனும், வியான் முல்டர் 15 பந்துகளில் 19 ரன்களுடனும் ஆட்டமிழக்காமல் களத்தில் இருந்து அணியை வெற்றிப் பாதைக்கு அழைத்துச் சென்றனர். இதன் மூலம் 5 போட்டியில் விளையாடி மூன்றில் வெற்றி, இரண்டில் தோல்வி என 6 புள்ளிகளுடன் புள்ளி பட்டியலில் முதலிடத்தை பிடித்துள்ளது. எம்ஐ நியூயார்க் அணிக்கு இது மூன்று போட்டிகளில் இரண்டாவது தோல்வியாகும்.
