இந்திய கிரிக்கெட் அணியின் முன்னாள் தலைமைப் பயிற்சியாளர் ரவி சாஸ்திரி, விராட் கோலியின் ஆடுகள நடத்தை மற்றும் அவரது குணாதிசயம் குறித்து மனம் திறந்து பேசியுள்ளார். மைதானத்தில் கோலி ஒரு திமிர் பிடித்த, அடங்காத வீரராகத் தோன்றினாலும், மைதானத்திற்கு வெளியே அவர் முற்றிலும் மாறுபட்ட, அமைதியான நபர் என்று சாஸ்திரி குறிப்பிட்டுள்ளார்.
யூடியூப் சேனல் ஒன்றில் பேசிய ரவி சாஸ்திரி, கோலியுடனான தனது பயிற்சியாளர் மற்றும் கேப்டன் இடையிலான வெற்றிகரமான கூட்டணி குறித்துப் பகிர்ந்து கொண்டார். 'திமிர்பிடித்தவர், அடங்காதவர், எல்லாவற்றையும் எல்லை வரை கொண்டு செல்பவர் என்று மைதானத்தில் கோலியைப் பற்றிச் சொல்வது அனைத்தும் உண்மைதான். ஆனால், மைதானத்திற்கு வெளியே அவர் இதற்கு முற்றிலும் நேர் எதிரானவர். ஆட்டத்திற்குள் நுழையும்போது ஒரு விதமாகவும், வெளியே வரும்போது மற்றொரு விதமாகவும் மாறும் குணம் கொண்டவர்களை எனக்கு மிகவும் பிடிக்கும்' என்று அவர் தெரிவித்தார்.
மேலும், டெஸ்ட் கிரிக்கெட் எனப்படும் சிவப்புப் பந்து கிரிக்கெட்டை அடுத்த கட்டத்திற்கு எடுத்துச் சென்றதில் விராட் கோலியின் பங்கு மிக முக்கியமானது என்றும் ரவி சாஸ்திரி பாராட்டினார். கடந்த சில ஆண்டுகளில் சிவப்புப் பந்து கிரிக்கெட்டின் மிகப்பெரிய தூதர்களில் ஒருவராக அவர் திகழ்ந்துள்ளார். இந்த வகை கிரிக்கெட் மேம்படுத்துவதில் அவரது தாக்கம் அளப்பரியது. அவர் கேப்டனாக முன்னின்று வழிநடத்திய விதம், அணியின் மற்ற வீரர்களிடமும் அந்த தாக்கத்தை ஏற்படுத்தியது என்று சாஸ்திரி விவரித்தார்.
முன்னதாக, கிரிக்கெட் பாரம்பரியங்கள் குறித்துப் பேசிய கோலி, இந்தியாவுக்காக டெஸ்ட் கிரிக்கெட்டில் விளையாடுவதே இறுதி லட்சியமாகக் கருதப்பட்ட ஒரு காலகட்டத்தில் தான் வளர்ந்ததை அதிர்ஷ்டமாகக் கருதுவதாகக் குறிப்பிட்டிருந்தார். பெரோஸ் ஷா கோட்லா மைதானத்தின் பி மைதானம் வழியாகச் சென்று, முதன்மை மைதானத்தில் ரஞ்சி கோப்பை அணி வீரர்கள் தீவிரமாகப் பயிற்சி பெறுவதை உற்று நோக்கிய அந்த ஆரம்ப கால நினைவுகள், அவர்கள் மீது தமக்கு மிகப்பெரிய உத்வேகத்தையும் தொழில்முறையிலான மரியாதையையும் ஏற்படுத்தியதாகக் கோலி நினைவு கூர்ந்தார்.
