தஞ்சை உழவர் சந்தையில் காய்கறிகளின் விலை திடீரென உயர்ந்துள்ளது. வழக்கமாக 20 டன்னாக இருந்த காய்கறி வரத்து, தற்போது 18 டன்னாக குறைந்துள்ளது. இதனால், முருங்கைக்காய் ஒரு கிலோ ரூ.98க்கும், பீன்ஸ் ரூ.112க்கும், இஞ்சி ரூ.160க்கும் விற்பனை செய்யப்படுகிறது. இது தவிர மற்ற காய்கறிகளின் விலையும் கணிசமாக உயர்ந்துள்ளது.
இந்த திடீர் விலை உயர்வால் இல்லத்தரசிகள் அதிர்ச்சியடைந்துள்ளனர். அன்றாட சமையலுக்குத் தேவையான காய்கறிகளை வாங்குவதற்கே அதிக செலவாகிறது என அவர்கள் கவலை தெரிவித்துள்ளனர். குறைந்த அளவிலேயே காய்கறிகளை வாங்கும் நிலைக்கு தள்ளப்பட்டுள்ளதாக வேதனையுடன் தெரிவித்தனர்.
வரத்து குறைவுதான் விலை உயர்வுக்கு முக்கிய காரணம் என வியாபாரிகள் தெரிவிக்கின்றனர். போதிய அளவு காய்கறிகள் சந்தைக்கு வராததால், கையிருப்பில் உள்ள காய்கறிகளுக்கு அதிக விலை நிர்ணயிக்க வேண்டியுள்ளது என்றும் அவர்கள் விளக்கினர்.
தஞ்சை மாவட்டத்தில் நிலவும் இந்த காய்கறி விலை உயர்வு, நுகர்வோரை பெரிதும் பாதித்துள்ளது. விரைவில் வரத்து அதிகரித்து, விலை குறையும் என மக்கள் எதிர்பார்க்கின்றனர்.
