இந்தியா மற்றும் ஆப்கானிஸ்தான் அணிகளுக்கு இடையேயான ஒரே டெஸ்ட் போட்டியில், இந்திய அணி இன்னிங்ஸ் மற்றும் 300 ரன்கள் வித்தியாசத்தில் அபார வெற்றி பெற்றுள்ளது. இந்தப் போட்டியில் சுப்மன் கில் முதல் இன்னிங்சில் சதம் அடித்து அசத்தினார். இது ஒரு முழுமையான வெற்றி என்றும், அனைத்து அம்சங்களிலும் சிறப்பாகச் செயல்பட்டோம் என்றும் கேப்டன் சுப்மன் கில் மகிழ்ச்சி தெரிவித்தார்.
ஃபாலோ-ஆன் கொடுப்பது குறித்த முடிவைப் பற்றி பேசிய கில், 'வெயில் அதிகமாக இருந்ததால், மதிய உணவிற்கு முன்போ அல்லது முதல் இடைவேளைக்குப் பிறகோ விக்கெட்டுகளை வீழ்த்தினால், பந்துவீச்சாளர்கள் புத்துணர்ச்சியுடன் இருந்தால் ஃபாலோ-ஆன் கொடுக்கலாம் என முடிவு செய்தோம். இல்லையென்றால், இன்னும் இரண்டு செஷன்கள் பேட்டிங் செய்துவிட்டு, அன்றைய நாளின் இறுதியில் அவர்களை மீண்டும் பந்துவீச அழைக்கலாம் என்று நினைத்தோம். ஆனால், எங்களுக்கு விக்கெட்டுகள் விரைவாகக் கிடைத்தன. எங்கள் வேகப்பந்து வீச்சாளர்கள் பந்துவீசிய விதம் சிறப்பாக இருந்தது. ஃபாலோ-ஆன் கொடுத்த பிறகு சிராஜ் அந்த முக்கியமான விக்கெட்டை எடுத்துக் கொடுத்தார். பிரசித் மூன்று முக்கியமான விக்கெட்டுகளை வீழ்த்தினார்' என்று கூறினார்.
மானவ், வாஷி மற்றும் குல்தீப் ஆகியோரின் தரம் குறித்து தனக்கு எந்த சந்தேகமும் இல்லை என்றும், இது அனுபவம் பெறுவதைப் பொறுத்தது என்றும் கில் குறிப்பிட்டார். அதிக ஓவர்கள் வீசுவது, இது போன்ற ஆடுகளங்களில் பேட்ஸ்மேன்களை எப்படி வீழ்த்துவது, வேகத்தை மாற்றி வீசுவது மற்றும் வெவ்வேறு பகுதிகளில் பேட்ஸ்மேன்களைச் சோதிப்பது ஆகியவை தான் முக்கியம் என்றும் அவர் தெரிவித்தார். 'முதலில் பேட்டிங் செய்யும் போது, எந்தச் சூழலாக இருந்தாலும், எந்த மைதானமாக இருந்தாலும் 350 ரன்களுக்கு மேல் எடுக்க முயற்சிக்க வேண்டும். எங்கு விளையாடினாலும் 20 விக்கெட்டுகளை எடுக்கும் திறன் எங்கள் பந்துவீச்சாளர்களிடம் உள்ளது என்ற நம்பிக்கை எங்களுக்கு இருக்கிறது' என்றும் அவர் கூறினார்.
அணியில் மாற்றம் ஏற்படும் போது, பேட்டிங் வரிசை அதிக அழுத்தத்தில் இருப்பதை உணர்கிறோம், எனவே அனுபவத்தைப் பெற முயற்சிக்கிறோம். ஒரு பேட்டிங் குழுவாக வெவ்வேறு சூழ்நிலைகளில் எப்படித் தொடர்ந்து 350-400 ரன்களைக் குவிப்பது என்பதே எங்கள் இலக்கு. என்று கேப்டன் கில் தெரிவித்தார். இந்த வெற்றியின் மூலம் இந்திய அணி வரலாற்றுச் சாதனையை படைத்துள்ளது.
