சென்னையில் இன்று (மே 28) தங்கத்தின் விலை தொடர்ந்து மூன்றாவது நாளாக சரிந்துள்ளது. 22 காரட் ஆபரணத் தங்கத்தின் விலை ஒரு பவுனுக்கு ரூ.1,200 குறைந்து, ரூ.1,16,000-க்கு விற்பனையாகிறது. ஒரு கிராம் தங்கத்தின் விலையும் கிராமுக்கு ரூ.150 குறைந்து, ரூ.14,500-க்கு விற்பனையாகிறது.
சர்வதேச பொருளாதார மற்றும் அரசியல் சூழல், மத்திய கிழக்கில் நிலவும் போர் பதற்றம், கச்சா எண்ணெய் விலை, அமெரிக்க டாலருக்கு நிகரான இந்திய ரூபாயின் மதிப்பு, தங்கத்தின் மீதான முதலீடு, உலக பங்குச் சந்தை செயல்பாடு போன்ற பல்வேறு காரணிகளின் அடிப்படையில் தங்கத்தின் விலை நிர்ணயிக்கப்படுகிறது. உலக அளவில் தங்கத்தை இறக்குமதி செய்யும் நாடுகளில் இந்தியாவும் முக்கிய பங்கு வகிக்கிறது.
கடந்த மே 13-ம் தேதி, தங்கத்தின் மீதான இறக்குமதி வரியை மத்திய அரசு 6 சதவீதத்திலிருந்து 15 சதவீதமாக உயர்த்தியது. இந்த வரி உயர்விற்குப் பிறகு தங்கத்தின் விலையில் தொடர்ந்து ஏற்ற இறக்கங்கள் காணப்படுகின்றன. குறிப்பாக, மே 26, 27, 28 ஆகிய மூன்று நாட்களில் மட்டும் தங்கம் விலை கிராமுக்கு ரூ.280 மற்றும் பவுனுக்கு ரூ.2,240 வரை குறைந்துள்ளது.
இன்றைய நிலவரப்படி, 24 காரட் தங்கத்தின் விலை பவுனுக்கு ரூ.1,312 குறைந்து ரூ.1,26,544-க்கும், 18 காரட் தங்கத்தின் விலை பவுனுக்கு ரூ.1,040 குறைந்து ரூ.97,280-க்கும் விற்பனையாகிறது. இதேபோல், வெள்ளி விலையும் குறைந்துள்ளது. வெள்ளி கிராமுக்கு ரூ.5 குறைந்து ரூ.285-க்கும், கட்டி வெள்ளி கிலோவுக்கு ரூ.5,000 குறைந்து ரூ.2,85,000-க்கும் விற்பனையாகிறது.
