கோவை மாநகராட்சிக் குப்பைக் கிடங்கில் தவறுதலாக விழுந்த 3 பவுன் தங்கச் சங்கிலியை, பேராசைப்படாமல் நேர்மையுடன் அதன் உரிமையாளரிடம் பத்திரமாக ஒப்படைத்த தூய்மைப் பணியாளர் சக்திவேல், தற்போது அனைவரின் பாராட்டையும் பெற்று வருகிறார். அவரது இந்த மனிதநேயச் செயல் கோவை மாநகராட்சிக்கு மேலும் நற்பெயரைத் தேடித் தந்துள்ளது.
கோவை மாநகராட்சி மத்திய மண்டலத்திற்கு உட்பட்ட வார்டு எண் 69, பாரதி பார்க் 4-வது வீதியைச் சேர்ந்த பொதுமக்கள் சிலர், தங்கள் வீட்டில் இருந்த குப்பைகளை அகற்றும் போது, எதிர்பாராத விதமாகத் தங்களின் 3 பவுன் மதிப்புள்ள தங்கச் சங்கிலியையும் குப்பையோடு குப்பையாகத் தவறுதலாக வீசிவிட்டனர்.
குப்பை சேகரிக்கும் பணியில் ஈடுபட்டிருந்த கோவை மாநகராட்சி தூய்மைப் பணியாளர் சக்திவேல், சேகரித்த குப்பைகளைச் சோதித்தபோது, அதற்குள் புதைந்து கிடந்த 3 பவுன் தங்கச் சங்கிலியைக் கண்டுபிடித்தார். உடனடியாக அதன் அசல் உரிமையாளரைத் தொடர்பு கொண்டு, அவர்கள் முன்னிலையிலேயே நகையை நேர்மையாகத் திரும்ப ஒப்படைத்தார். கண்டெடுத்த நகையை அப்படியே திரும்ப கொடுத்த தூய்மைப் பணியாளரின் உன்னத நேர்மையைக் கண்டு நெகிழ்ந்துபோன உரிமையாளர்கள், அவருக்கு மனமார்ந்த நன்றியைத் தெரிவித்தனர்.
இந்தச் சம்பவம் குறித்து அறிந்த கோவை மாநகராட்சி ஆணையாளர், நேர்மையின் சிகரமாக விளங்கிய பணியாளர் சக்திவேலைப் பொன்னாடை அணிவித்து, தனது மனமார்ந்த வாழ்த்துகளையும் பாராட்டுகளையும் தெரிவித்துக் கொண்டார். எத்தனையோ பொருளாதார நெருக்கடிகள் நிறைந்த தற்போதைய கால கட்டத்திலும், அடுத்தவர் பொருளுக்கு ஆசைப்படாமல் நேர்மைக்கு இலக்கணமாகத் திகழ்ந்த வார்டு 69 பணியாளர் சக்திவேலின் இந்தச் செயல் மக்களிடையே பெரும் நெகிழ்ச்சியையும், சமூக வலைத்தளங்களில் வைரல் பாராட்டுகளையும் குவித்து வருகிறது.
