சர்வதேச சந்தையில் கச்சா எண்ணெய் விலை தொடர்ந்து உயர்ந்து வருவதை சுட்டிக்காட்டி, இந்தியாவில் பெட்ரோல், டீசல் விலைகள் கடந்த இரண்டு வாரங்களில் நான்காவது முறையாக அதிகரிக்கப்பட்டுள்ளன. இதன் விளைவாக, சென்னையில் பெட்ரோல் விலை லிட்டருக்கு ரூ.2.46 உயர்ந்து ரூ.107.77 ஆகவும், டீசல் விலை லிட்டருக்கு ரூ.2.57 உயர்ந்து ரூ.99.55 ஆகவும் விற்பனை செய்யப்படுகிறது. இந்த தொடர் விலை உயர்வு பொதுமக்களிடையே பெரும் அதிர்ச்சியை ஏற்படுத்தியுள்ளது.
பெட்ரோல், டீசல் விலை உயர்வு குறித்து காங்கிரஸ் எம்.பி மாணிக்கம் தாக்கூர் மத்திய அரசை கடுமையாக விமர்சித்துள்ளார். இது தொடர்பாக அவர் வெளியிட்டுள்ள அறிக்கையில், 'எண்ணெய் நிறுவனங்கள் லாபம் ஈட்டும் போது அதை மக்களுடன் பகிர்ந்து கொள்வதில்லை. மாறாக, நஷ்டம் ஏற்படும் போது மட்டும் அதை மக்களுடன் பகிர்ந்து கொள்கின்றன' என்று குறிப்பிட்டுள்ளார்.
மேலும், பிரதமர் மோடி பெருநிறுவனங்களுக்காகவே செயல்படுவதாக மாணிக்கம் தாக்கூர் குற்றம் சாட்டினார். கடந்த ஏழு காலாண்டுகளாக எண்ணெய் நிறுவனங்கள் தொடர்ந்து லாபம் ஈட்டி வருவதாகவும், குறிப்பாக நிதியாண்டு 2024-ல் மட்டும் ரூ.81,000 கோடி லாபம் ஈட்டியுள்ளதாகவும் அவர் சுட்டிக்காட்டினார்.
எண்ணெய் நிறுவனங்கள் லாபத்தைப் பகிர்ந்து கொள்ளாத நிலையில், நஷ்டத்தை மட்டும் பொதுமக்களின் மீது சுமத்துவதை மாணிக்கம் தாக்கூர் தனது பதிவில் கண்டித்துள்ளார். இந்த விலை உயர்வு சாதாரண மக்களை கடுமையாக பாதிக்கும் என எதிர்பார்க்கப்படுகிறது.
