கர்நாடக மாநிலம் பீதர் மாவட்டத்தில் உள்ள அரசு மருத்துவமனையில், நோயாளியின் உறவினர்கள் மருத்துவர் ஒருவரை சரமாரியாக தாக்கிய சம்பவம் அதிர்ச்சியை ஏற்படுத்தியுள்ளது. இந்த தாக்குதலில் ஈடுபட்ட 10 பேர் கைது செய்யப்பட்டுள்ளனர்.
நேற்று முன்தினம் இரவு, அரசு மருத்துவமனையின் அவசர சிகிச்சைப் பிரிவில் மருத்துவர் மச்சிந்த்ரா துக்காராம் பணியில் ஈடுபட்டிருந்தார். நள்ளிரவு சுமார் 1 மணியளவில், விஜயா சிங் என்ற நோயாளி, வாகன விபத்தில் ஏற்பட்ட காயங்களுடன் மருத்துவமனைக்கு கொண்டுவரப்பட்டார். அவருக்கு உடனடியாக சிகிச்சை அளிக்கப்படவில்லை என்று கூறி, நோயாளியின் உறவினர்கள் 10-க்கும் மேற்பட்டோர் மருத்துவர் துக்காராமுடன் வாக்குவாதத்தில் ஈடுபட்டனர்.
வாக்குவாதம் முற்றிய நிலையில், ஆத்திரமடைந்த உறவினர்கள் மருத்துவர் துக்காராமை சரமாரியாக தாக்கத் தொடங்கினர். இந்த தாக்குதல் சம்பவம் மருத்துவமனை வளாகத்தில் பெரும் பரபரப்பை ஏற்படுத்தியது. உடனடியாக காவல்துறையினர் சம்பவ இடத்திற்கு விரைந்து வந்து நிலைமையை கட்டுக்குள் கொண்டு வந்தனர்.
இது தொடர்பாக வழக்கு பதிவு செய்த காவல்துறையினர், தாக்குதலில் ஈடுபட்ட 10 நோயாளியின் உறவினர்களை கைது செய்து விசாரணை நடத்தி வருகின்றனர். இந்த சம்பவம் மருத்துவர்கள் மத்தியில் அச்சத்தையும், பாதுகாப்பு குறித்த கேள்விகளையும் எழுப்பியுள்ளது.
