தர்மபுரி மாவட்டம் பென்னாகரம் சின்னபட்டி பகுதியைச் சேர்ந்த பூபதி (45), சேலம் மாவட்டம் ஓமலூர் அருகே வேலகவுண்டனூர் எஸ்.கே.நகரில் குடும்பத்துடன் வசித்து வந்தார். செங்கல், சிமெண்டு கற்கள் வாங்கி விற்பனை செய்யும் தொழில் அதிபரான இவருக்கு சுஜிதாஸ்ரீ (31) என்ற மனைவியும், ஸ்ரீராம் (12), சாய்ஸ்ரீ (10) என்ற இரு குழந்தைகளும் உள்ளனர்.
நேற்று அதிகாலையில், பூபதியின் தங்கை பூங்கொடியை செல்போனில் தொடர்பு கொண்ட சுஜிதாஸ்ரீ, பதற்றத்துடன் பேசினார். மகன் ஸ்ரீராமுக்கு உடல்நிலை சரியில்லை என்றும், ஆட்டுக்காரனூர் சரபங்கா ஆற்றுப்பகுதியில் ஒருவரிடம் மந்திரித்து கயிறு கட்டுவதற்காக வந்தபோது, சிலர் உங்கள் அண்ணனை வெட்டிக்கொலை செய்துவிட்டு தனது நகையை பறித்துக்கொண்டு தப்பிச் சென்றுவிட்டதாகவும் அதிர்ச்சி தகவலைக் கூறினார்.
உடனடியாக பூங்கொடி ஓமலூர் போலீசாருக்கு தகவல் தெரிவித்தார். இன்ஸ்பெக்டர் சண்முகம், சப்-இன்ஸ்பெக்டர் மாரியப்பன் மற்றும் போலீசார் சம்பவ இடத்திற்கு விரைந்து சென்றனர். அங்கு காரின் முன் இருக்கையில் சாய்ந்த நிலையில் பூபதி ரத்த வெள்ளத்தில் பிணமாக கிடந்தார். போலீசார் பூபதியின் உடலை மீட்டு பிரேத பரிசோதனைக்கு அனுப்பி வைத்தனர். கைரேகை நிபுணர்கள் வரவழைக்கப்பட்டு தடயங்கள் பதிவு செய்யப்பட்டன.
பூபதி தங்கை பூங்கொடி கொடுத்த புகாரின் பேரில் போலீசார் விசாரணை நடத்தினர். பூபதி உடலில் இருந்த வெட்டுக்காயங்கள் அரிவாளால் வெட்டியது போல் இல்லாமல், அரிவாள்மனையால் வெட்டியது போல் இருந்ததும், காரில் வைத்து கொலை நடந்தது போன்ற தடயங்கள் இல்லாததும் போலீசாருக்கு சந்தேகத்தை ஏற்படுத்தியது. மேலும், நகை பறிக்கப்பட்டதாக சுஜிதாஸ்ரீ கூறிய நிலையில், அவருக்கு எந்த காயமும் ஏற்படவில்லை.
வேறு எங்கோ கொலை செய்துவிட்டு, உடலை இங்கு கொண்டு வந்து வைத்து சுஜிதாஸ்ரீ நாடகம் ஆடுகிறாரா? என்ற கோணத்தில் போலீசார் விசாரணை நடத்தினர். சுஜிதாஸ்ரீ முன்னுக்குப்பின் முரணாக பதிலளித்ததால், அவரிடம் தீவிர விசாரணை நடத்தப்பட்டது. அப்போது, அவர் தனது கள்ளக்காதலனுடன் சேர்ந்து கணவரை கொலை செய்த கொடூர சம்பவம் அம்பலமானது.
சுஜிதாஸ்ரீக்கு ஏற்கனவே பலருடன் கள்ளத்தொடர்பு இருந்து வந்துள்ளது. திருமணம் ஆகாத வாலிபர்களுடன் கணவர் வீட்டில் இல்லாத நேரத்தில் உல்லாசமாக இருந்து வந்துள்ளார். தற்போது எதிர் வீட்டில் வசிக்கும் பெங்களூரில் பணியாற்றும் ஐடி ஊழியரான சந்தோஷ் ராஜ் என்பவருடன் கடந்த 2 ஆண்டுகளாக கள்ளத்தொடர்பில் இருந்து வந்ததும் தெரியவந்தது.
இந்த கள்ளக்காதல் விவகாரம் குறித்து அறிந்த பூபதி, சுஜிதாஸ்ரீயை கண்டித்துள்ளார். இது தொடர்பாக அடிக்கடி கணவன்-மனைவி இடையே தகராறு ஏற்பட்டு வந்துள்ளது. நேற்று முன்தினம் இரவும் அவர்களுக்குள் தகராறு முற்றியது. அப்போது சுஜிதாஸ்ரீ, பூபதியை கீழே தள்ளி உள்ளார். இதில் தலையில் அடிபட்டு பூபதி மயங்கி விழுந்தார்.
இதனையடுத்து சுஜிதாஸ்ரீ தனது கள்ளக்காதலன் சந்தோஷ் ராஜுக்கு போன் செய்து வீட்டிற்கு வரவழைத்தார். பின்னர் இருவரும் சேர்ந்து பூபதியை கத்தியால் பல்வேறு இடங்களில் குத்தி கொலை செய்தனர். பின்னர், கொலை செய்யப்பட்ட பூபதியின் உடலை காரில் முன் சீட்டில் அமர வைத்து, ஓமலூரில் இருந்து தாரமங்கலம் செல்லும் சாலையில் ஆட்டுக்காரனூர் அருகே சரபங்கா ஆற்று ஓரமாக காரை நிறுத்தி, கோவிலுக்கு செல்லும்போது நகைக்காக கொலை நடந்ததாக நாடகமாடியது விசாரணையில் அம்பலமானது.
இதையடுத்து போலீசார் சுஜிதாஸ்ரீயை கைது செய்தனர். கள்ளக்காதலன் சந்தோஷ் ராஜிடம் விசாரணை நடைபெற்று வருகிறது. இந்த கொலை வழக்கில் இருவரையும் நீதிமன்றத்தில் ஆஜர்படுத்தி சிறையில் அடைக்க போலீசார் நடவடிக்கை எடுத்து வருகின்றனர்.
