சென்னை, காஞ்சிபுரம், திருவள்ளூர், செங்கல்பட்டு மாவட்டங்களில் வடகிழக்கு பருவமழை முன்னெச்சரிக்கை நடவடிக்கையாக நீர்வழித்தடங்களைத் தூர்வாரும் பணிகளுக்கான டெண்டரில் அதிகாரிகள் முறைகேட்டில் ஈடுபட்டதாக பாதிக்கப்பட்ட அஜய் பில்டர்ஸ் நிறுவனம் நீர்வளத்துறை செயலாளரிடம் பரபரப்பு புகார் மனு அளித்துள்ளது.
ஆன்லைன் டெண்டரில் யார் வேண்டுமானாலும் பங்கேற்கலாம் என்ற நிலையில், வேண்டுமென்றே சில நிபந்தனைகளை விதித்து, தங்களை டெண்டரில் பங்கேற்க விடாமல் அதிகாரிகள் தடுத்ததாக அஜய் பில்டர்ஸ் நிறுவனம் குற்றம்சாட்டியுள்ளது. மேலும், குறுகிய கால டெண்டர் அறிவிக்கப்பட்டு, வெறும் ஏழு நாட்களில் ஒப்பந்ததாரர்களுக்கு உரிய சான்றிதழ்களை வழங்காமல், அதிகாரிகள் வேண்டுமென்றே காலம் தாழ்த்தியதாகவும், தங்களுக்கு வேண்டிய நிறுவனங்களுக்கு சாதகமாக டெண்டர் வழங்கப்பட்டதாகவும் அந்த நிறுவனம் தனது புகார் மனுவில் குறிப்பிட்டுள்ளது.
இந்த முறைகேடுகளால் தங்களுக்கு பெரும் பாதிப்பு ஏற்பட்டுள்ளதாகவும், இது குறித்து உரிய விசாரணை நடத்தி நடவடிக்கை எடுக்க வேண்டும் என்றும் அஜய் பில்டர்ஸ் நிறுவனம் கோரியுள்ளது.
நீர்வளத்துறை செயலாளருக்கு அனுப்பப்பட்டுள்ள இந்த புகார் மனு மீது எடுக்கப்பட்ட நடவடிக்கை குறித்து உடனடியாகத் தெரிவிக்க வேண்டும் என்றும், அவ்வாறு தெரிவிக்கப்படாவிட்டால், நிறுவனம் சார்பில் சட்ட ரீதியான வழக்கு தொடரப்படும் என்றும் எச்சரிக்கை விடுக்கப்பட்டுள்ளது.
வடகிழக்கு பருவமழை நெருங்கி வரும் நிலையில், முன்னெச்சரிக்கை நடவடிக்கையாக மேற்கொள்ளப்படும் தூர்வாரும் பணிகளுக்கான டெண்டரிலேயே இதுபோன்ற முறைகேடுகள் நடைபெறுவது பொதுமக்களிடையே அதிர்ச்சியை ஏற்படுத்தியுள்ளது.
அதிகாரிகளின் இந்த தலையீடு, மழைக்காலங்களில் ஏற்படக்கூடிய பாதிப்புகளைத் தடுக்கும் பணிகளை தாமதப்படுத்துவதோடு, அரசு நிதியை முறைகேடாகப் பயன்படுத்த வழிவகுக்கும் என்ற கவலையும் எழுந்துள்ளது.
பாதிக்கப்பட்ட நிறுவனம் சார்பில் அளிக்கப்பட்ட இந்த புகார் மனுவின் மீது நீர்வளத்துறை செயலாளர் உரிய கவனம் செலுத்தி, நியாயமான விசாரணை நடத்தி, சம்பந்தப்பட்ட அதிகாரிகள் மீது நடவடிக்கை எடுப்பார் என எதிர்பார்க்கப்படுகிறது.
இந்த விவகாரம் தொடர்பாக அடுத்தகட்டமாக அஜய் பில்டர்ஸ் நிறுவனம் சட்டரீதியான நடவடிக்கைகளை மேற்கொள்வதற்கான ஆயத்தப் பணிகளையும் மேற்கொண்டு வருவதாகத் தகவல்கள் தெரிவிக்கின்றன.
