நாடு முழுவதும் விநாயகர் சதுர்த்தி விழா நாளை கோலாகலமாக கொண்டாடப்படவுள்ள நிலையில், அனுமதியின்றி விநாயகர் சிலைகள் வைத்தால் கடும் நடவடிக்கை எடுக்கப்படும் என காவல்துறை எச்சரிக்கை விடுத்துள்ளது.
சென்னையைப் பொறுத்தவரை, இந்த விழாவிற்காக 16,500 போலீசார் மற்றும் 1,500 ஊர் காவல்படை வீரர்கள் பாதுகாப்புப் பணியில் ஈடுபடுத்தப்பட உள்ளனர். சென்னையில் மொத்தம் 1,562 இடங்களில் விநாயகர் சிலைகள் வைத்து வழிபாடு நடத்த அனுமதி வழங்கப்பட்டுள்ளது. சிலைகள் நிறுவப்பட்டுள்ள அனைத்து இடங்களிலும் சிசிடிவி கேமராக்கள் பொருத்தவும், தலா இரண்டு தன்னார்வலர்கள் பாதுகாப்புக்கு நியமிக்கவும் அறிவுறுத்தப்பட்டுள்ளது.
நாளை நிறுவப்படும் விநாயகர் சிலைகள், வரும் செப்டம்பர் 19 மற்றும் 20 ஆகிய தேதிகளில், காவல்துறை அனுமதித்த வழித்தடங்கள் வழியாக ஊர்வலமாக எடுத்துச் செல்லப்பட்டு, நீர்நிலைகளில் கரைக்க ஏற்பாடுகள் செய்யப்பட்டுள்ளன. சிலைகள் வைக்கப்பட்டுள்ள பகுதிகளைச் சுற்றி, இருசக்கர வாகனங்கள் மற்றும் கார்கள் மூலம் போலீசார் தொடர்ந்து ரோந்து பணியில் ஈடுபடுவார்கள்.
முக்கியமாக, உரிய அனுமதி பெறாமல் எந்த இடத்திலும் விநாயகர் சிலைகளை வைத்து வழிபாடு நடத்த அனுமதி இல்லை என்பதை காவல்துறை தெளிவுபடுத்தியுள்ளது. இந்த கட்டுப்பாடுகளை மீறுவோர் மீது சட்டப்படி கடுமையான நடவடிக்கை எடுக்கப்படும் என்றும் எச்சரிக்கை விடுக்கப்பட்டுள்ளது. பொதுமக்களின் பாதுகாப்பை உறுதி செய்யவும், விழா அமைதியான முறையில் நடைபெறவும் இந்த நடவடிக்கைகள் மேற்கொள்ளப்படுகின்றன.
