இளம் கிரிக்கெட் வீரர் வைபவ் சூர்யவன்ஷியின் அதிரடி ஆட்டமும், தொடர்ச்சியான போட்டிகளில் பங்கேற்பதும், அவருக்கு சச்சின் டெண்டுல்கரைப் போல குறிப்பிட்ட வகை காயங்களை ஏற்படுத்தக்கூடும் என தென்னாப்பிரிக்காவின் முன்னாள் வீரர் டேரில் கல்லினன் எச்சரிக்கை விடுத்துள்ளார். அண்மையில் ஐபிஎல் மற்றும் இலங்கை முத்தரப்பு தொடரில் சிறப்பாக விளையாடிய வைபவ், விரைவில் அயர்லாந்து தொடரில் சர்வதேச கிரிக்கெட்டில் அறிமுகமாக உள்ளார்.
வைபவின் அதிவேக பேட்டிங் திறனைப் பலரும் பாராட்டினாலும், அவரது மணிக்கட்டு மற்றும் முழங்கை மூட்டுகள் அதிக அழுத்தத்திற்கு உள்ளாவதாக டேரில் கல்லினன் கவலை தெரிவித்துள்ளார். இது குறித்து தனது சமூக வலைத்தளப் பக்கத்தில் அவர் பதிவிட்டதாவது: 'வைபவ் சூர்யவன்ஷியின் ஆட்டம் என்னை வியக்க வைத்தாலும், அவரது காயங்கள் குறித்து எனக்கு கவலை உள்ளது. 15 வயதில் கனமான பேட்டை அசுர வேகத்தில் வீசி, இடைவிடாமல் கிரிக்கெட் விளையாடுவது அவரது மணிக்கட்டு மற்றும் முழங்கை மூட்டுகளைப் பாதிக்கும். 2004 இல் சச்சின் டெண்டுல்கருக்கு ஏற்பட்ட கடுமையான டென்னிஸ் எல்போ காயம் அவரது கிரிக்கெட் வாழ்க்கையையே முடிவுக்குக் கொண்டுவரும் நிலைக்குத் தள்ளியது. சச்சின்கூட வைபவ் அளவுக்கு இவ்வளவு ஆக்ரோஷமாக தொடர்ந்து பந்துகளை அடித்ததில்லை' என்று குறிப்பிட்டுள்ளார்.
மேலும், வைபவ் இன்னும் வளரும் பருவத்தில் இருப்பதாகவும், அவரது தசைநார்கள், தசைகள் மற்றும் மூட்டுகள் இன்னும் முழுமையாக வளர்ச்சி அடையவில்லை என்றும் கல்லினன் தெரிவித்துள்ளார். தற்போதைய கிரிக்கெட் சூழலில் கனமான பேட்டுகள் பயன்படுத்தப்படுகின்றன, மேலும் போட்டிகளின் அட்டவணையும் மிக நெருக்கமாக உள்ளது. 14 ஐபிஎல் போட்டிகள், இலங்கை தொடர் மற்றும் அயர்லாந்து தொடர் என அவர் ஓய்வில்லாமல் விளையாடுகிறார். 16 வயதை தொடுவதற்கு முன்பாகவே இவ்வளவு சுமை அவரது உடலை கடுமையாக பாதிக்கும் என்றும் அவர் கவலை தெரிவித்துள்ளார்.
நவீன உடற்பயிற்சி முறைகள் உதவினாலும், அவரது நீண்ட கால எதிர்காலம் மற்றும் உடற்தகுதி குறித்து தனக்கு அச்சம் உள்ளதாக கல்லினன் எச்சரித்துள்ளார். சச்சினுக்கு ஏற்பட்டதைப் போன்ற நிலை வைபவுக்கு வந்துவிடக்கூடாது என்பதே அவரது முக்கியக் கவலையாகும்.
